VOV4.K’ho - Xã Quảng Khê gơwèt kơnhoàl Dăk Glong, càr Dăk Nông là dùl tàm ală kơnhoàl rơƀah ngan gùt lơgar dê. Mờ geh uă khà kờp làng bol là kòn cau, rài kis gam uă kal ke, mơya làng bol neh tus bal dùl nùs mờ gơnoar atbồ tàm do lơh geh cồng nha broă bơ̆t bơtàu ƀòn lơgar pa.

Hìu dềt geh lơh niam bơh ồng K’ Prum, kis tàm ƀòn Phi Mur, xã Quảng Khê ram mhŭ mờ săp ñŏ săp nhơl. Ngai do ală oh kòn bal mờ oh mi ƀòn lơgar tus nhơl ñô sa chờ gờm nam pa.

                                                            Gùng lòt gan ƀòn Phi Mur

Ồng pà git, kàl lơh sa pa do tơnhào geh 3 tấn kơphe, tăc geh rơlao 120 tơlăk đong. Oh kòn neh jơh dờng, neh geh bao, den tàng khà priă do kung tơl nàng bàr nă ùr bơklao ồng kis mờ bơcri tàm broă tơnguh bơtàu lơh sa suơn sre. Ồng K’ Prum đơs là, ờ mìng hìu nhă ồng, mờ jơh làng bol tàm ƀòn ndrờm geh rài kis niam bơnĕ rơlao tài kơnờm bơh broă tus bal bơ̆t bơtàu ƀòn lơgar pa. “Bơh tŭ geh gùng pa lơh gơs, geh hìu đam niam, añ gŏ làng bol tàm ƀòn lơh sa kung gơguh sơl rơlao, ƀuơn rơlao, oh kòn lòt bơsram sră kung ƀuơn rơlao, broă lòt rê tàm ƀòn bè tus còp să bal kung ƀuơn rơlao. Bơ̆t bơtàu ƀòn lơgar pa, làng bol, bol añ ring nùs ngan tàm broă ai ù lơh gùng lòt, lơh broă lơh geh kwơ tàm ƀòn”.

                                                   Tiah tờm tàm gùl xã Quảng Khê

Yal bè rài kis pa, ồng K’ Krang, kra ƀòn kis tàm ƀòn Phi Mur chờ hờp đơs: tŭ do jơh ală hìu nhă lơi kung neh geh hìu dờng niam. Hơ̆ là kơnờm mờ broă ring nùs tam klăc bal, dong kờl bal, bơsram bal nàng tơnguh bơtàu lơh sa. Geh pơnrơ ngan là tàm broă bơ̆t bơtàu ƀòn lơgar pa, tŭ dà lơgar geh gùng dà broă lơh, là làng bol rơcang ai ù, pơgồp ngai lơh broă nàng lơh gùng bal. Bè hìu ồng neh ai 60 thơ̆k ù rềp tềng gah gùng tềng đăp hìu, mờ rơlao 100 thơ̆k ù lòt tus tàm suơn, nàng pờ gùng lòt gan ƀòn mờ tus tàm tiah lơh sa. Ồng K’ Krang đơs: “Làng bol kis tàm ƀòn Phi Mur cau yoan kung bè cau kòn cau kis tam klăc bal dùl nùs, pơgồp bal lơh gùng lòt, den tàng hơ̆ sồng geh gùng lòt kloh niam tus tàm gùt xã, gùng lòt lơh broă kung dờng ơnàng nàng pơn diang phan geh lơh bơh broă lơh sa suơn sre, pơn diang phan kă bro... Cau yoan mờ cau kòn cau kis tàm do kung tam klăc bal, ờ geh tam phà, ờ geh tam lah, bơ̆t bơtàu bal ƀòn tơnguh bơtàu”.

Tàm kơnhoàl Dăk Glong, do là dùl tàm ală kơnhoàl rơƀah ngan gùt lơgar dê geh dờp broă lơh 30A, xã Quảng Khê geh uă ngan khà kờp làng bol là kòn cau. Ồng Nguyễn Tiến Duẩn, Củ tịc UɃÑZ xã Quảng Khê pà git, ală nam do, broă bơcri priă bơh dà lơgar neh dờp geh broă kờñ bal uă bơh làng bol dê. Bồ tơngoh kơlôi sơnơng bơh Đảng di mờ nùs nhơm làng bol, neh pơgồp bal tàm broă dong kờl xã Quảng Khê lơh geh 19 khà broă bơ̆t bơtàu ƀòn lơgar pa. Tus tŭ do, jơh 9 ƀòn mờ 3 thôn tàm xã ndrờm neh geh gùng lòt niam, phan lơh broă geh niam. Bơh xã kal ke geh nggùl khà kờp làng bol gơwèt hìu rơƀah, tŭ do Quảng Khê mìng gam ờ hềt tus 7% khà hìu rơƀah mờ 8% hìu ndrờm mờ rơƀah.

Nàng ƀòn lơgar ngai sơlơ tam gơl pa, đoàn viên ơruh pơnu tàm xã neh geh ală broă lơh ngai dơ̆ 7 nùs nhơm, ngai rơlôi tơlir, bal mờ làng bol sùm pơs wàs kloh niam tiah kis, tam tai uă tờm chi tàm ală gơl gùng. Bơdìh mờ broă bơcri priă bơh dà lơgar, ală Ci ƀộ, mpồl atbồ ƀòn bal mờ ală cau geh bơngă pin dờn tàm mpồl bơtiàn sùm tus bal lam sồr làng bol pơn jăt tai pơrlòng lơh sa, gàr niam broă bơ̆t bơtàu ƀòn lơgar pa ngai sơlơ niam mờ pas gơs. Ồng Nguyễn Tiến Duẩn pà git: “Bè broă bơ̆t bơtàu ƀòn lơgar pa den geh làng bol kờñ bal uă ngan, den tàng tus nam 2021, xã Quảng Khê neh geh xã ƀòn lơgar pa. Nghị quyết bơh Đảng ủy kung bè Nghị quyết bơh HĐÑZ xã den pơn jăt tai ală broă bơcri priă bơ̆t bơtàu broă lơh kung bè lam sồr nùs nhơm, phan bơna làng bol in tus bal dùl nùs nàng bơ̆t bơtàu ƀòn lơgar pa lam lài tàm tơngai pơn jăt tai”.

Dùl nam pa gam tus mờ di gơlan geh cèng tai uă bơta tam gơl tàm ù tiah ngài xã Quảng Khê, kơnhoàl Dăk Glong, càr Dăk Nông dê.

Cau mblàng Ndong Brawl