Tam cah is mờ hìu ơm bơh hìu nhă dê, tiah lơh wàng ròng sur jù bơh ùr bơklao bi A Tuấn mờ Y Chéc, kòn cau Jeh-Triêng, kis tàm thôn Dục Nhầy 3, xã tiah nhàr dà lơgar Đăk Dục, kơnhoàl Ngọc Hồi geh lơh niam ngan. Bal mờ broă lơh tiah wàng ròng tam pà bal geh gùng lòt tềng gùl nàng ƀuơn tàm broă sền gàr git nđờ jơ̆t nơm sur lơh poăc mờ sur me, hìu nhă gam tìm jàl nàng lơh geh dùl bă tiah hờ bơdìh ù ơnàng rơlao 100 thơ̆k vuông nàng sur in nhơl.

Bi A Tuấn pà git, bơh broă dong kờl, bơto sồr bơh kwang bàng lơh broă tàm Mpồl tam klăc cau ùr xã Đăk Dục dê bal mờ kwang bàng lơh broă tàm Pôs ling sền gàr tiah nhàr dà lơgar Dục Nông, hìu nhă neh bơtàu tơnguh geh broă ròng sur mờ tơn jơh broă pờ ting lềng sur. Bi A Tuấn pà git: “Đah cau ùr dong kờl 6 tơlăk đong, ùr bơklao blơi geh bàr nơm sur jù. Tus tŭ do deh 6 dơ̆ lời ròng jơh 6 dơ̆ tơn den tàng tus tŭ do geh bè do. Ùr bơklao cri bơyai tàm broă lơh wàng tàm do. Añ lơh nàng cèng hìu nhă in kơ̆ kơl jăp bè rài kis, tơl priă nàng ngui tàm rài kis”.

Lơh jăt Dơ̆ lam sồr “Lơh tam gơl bơta mờng kơlôi, broă lơh bơh làng bol jơi bơtiàn ờ gal cau, lơh làng bol jơi bơtiàn ờ gal cau in brồ guh lik klàs rơƀah kơl jăp”, 3 nam do kơnhoàl Kon Plông tơrgùm lơh broă tơrlòng tơmù rơƀah pơgồp bal mờ prăp gàr bơta niam chài nàng bơtàu tơnguh lòt nhơl. Mờ lơh pràn broă mblàng yal, lam sồr làng bol kòn cau Sơdàng, Hrê lơh wơl rơlao 155 lồ suơn. Tus jơh nhai 9 lài do, git nđờ rơhiang hìu làng bol jơi bơtiàn ờ gal cau kis tàm kơnhoàl neh lơh niam wơl suơn geh rơlao 50 lồ nàng tam gơl tam tờm chi sa plai, biăp, bơkào tiah mrềt. Ồng Châu Văn Lâm, Phó Ƀí thư Đảng ủy ƀòn drà dềt Măng Đen, kơnhoàl Kon Plông pà git, nàng tam gơl bơta mờng kơlôi, broă lơh bơh làng bol dê geh gơnoar kwơ màng bơh ală đảng viên dê tàm Ci ƀộ thôn, ƀòn.

Ồng Châu Văn Lâm pà git: “Ci ƀộ ală thôn mblàng yal, lam làng bol lơh jăt broă lơh niam wơl suơn nàng tam tờm chi sa plai, tam biăp, kơnuh, plai chi tiah mrềt nàng tơnguh rài kis pah ngai kung bè tơnguh uă priă geh ai làng bol in. Ci ƀộ tam pà tus tơl đảng viên dong kờl hìu, mpồl hìu. Bol añ ai đảng viên là bơta tờm, đảng viên drơng broă hìu mpồl hìu lơh lài, hơ̆ sồng hìu, mpồl hìu lơh jăt”.

Kơnhoàl Tu Mơ Rông, càr Kon Tum geh rơlao 95% khà kờp làng bol là kòn cau Sơdàng. Nàng tam gơl bơta mờng kơlôi, broă lơh bơh làng bol tàm broă lơh sa, gơnoar atbồ bal mờ ală mpồl lơh broă tàm kơnhoàl lơh jăt gùng dà broă lơh “rềp làng bol, rềp hìu” mờ “at tê bơto broă” ồng Ka Ba Thành, Ƀí thư Huyện ủy kơnhoàl Tu Mơ Rông pà git: cồng nha dờng màng ngan bơh kơnhoàl dê là neh tam gơl geh nùs nhơm lơh mìng tơl sa, ngòt càn priă, ngòt priă càn ngan hàng bơh làng bol dê, tàm hơ̆ uă ngan là gơwèt mờ ală hìu rơƀah. Ồng Ka Ba Thành pà git: “Làng bol neh bơtàu tơnguh lơh sa. Priă jơnkah dồs bơh nam 2021 tus nam 2023 là rơlao 280 tơmàn đong. Tàm 1 nam geh di pơgăp 80 tơmàn đong tàm khà priă càn là hìu rơƀah, hìu lik klàs rơƀah mờ hìu geh sră dong kờl. Bơh tŭ hơ̆ gŏ là neh tam gơl bơta mờng kơlôi, broă lơh bơh làng bol dê bơh tàm broă ờ rơcang, kơ̆p gơn tŭ do neh khin, rơcang lài càn priă nàng rề ơnàng lơh sa, tàm hơ̆ geh broă tam kơnuh sơnơm, tam tờm chi lơh sơnơm, ròng phan”.

Tơnơ̆ 3 nam lơh jăt Dơ̆ lam sồr “Lơh tam gơl bơta mờng kơlôi, broă lơh bơh làng bol jơi bơtiàn ờ gal cau, lơh làng bol jơi bơtiàn ờ gal cau brồ guh lik klàs rơƀah kơl jăp”, ală kấp, ală gah lơh broă tàm càr Kon Tum neh lơh, bơtàu tơnguh 866 broă tơrlòng lơh dong kờl bal lơh sa, lơh niam wơl suơn tam phan hòi jà geh mờr 10 rơbô 600 hìu rơƀah, hìu lik klàs rơƀah jơi bơtiàn ờ gal cau tus bal. ală broă tơrlòng lơh do neh hòi jà geh rơlao 96 tơmàn đong priă dong kờl sơntìl, priă, bơta chài lơh dong kờl rơlao 5 rơbô 500 hìu rơƀah jơi bơtiàn ờ gal cau lik klàs rơƀah kơl jăp.

Bal mờ hơ̆, khà hìu làng bol jơi bơtiàn ờ gal cau sơrbì rơhời ală bơhiàn ờ niam, git ngui bơta chài măi mok pa tàm broă lơh sa gơguh; khà hìu tus bal tàm mpồl lơh broă bal, mpồl lơh broă ndrờm geh mờ sơrlèt mờ jơnau neh geh ai… Ồng Dương Văn Trang, Ƀí thư Tỉñ ủy, Củ tịc Mpồl duh broă Làng bol càr Kon Tum, pà git, dùl tàm ală jơnau kờñ kwơ màng mờ dơ̆ lam sồr wèt tus là lơh tam gơl bơta mờng kơlôi, broă lơh bơh rơlao 9 rơbô 700 hìu rơƀah jơi bơtiàn ờ gal cau gam tai in nàng brồ guh lik klàs rơƀah. Ồng Dương Văn Trang pà git: “Tơngu me tam gơl bơta mờng kơlôi, broă lơh geh uă bơta ngan, mơya tàm hơ̆ tơrgùm tàm broă lơh sa. Lơh sa niam geh priă, geh priă uă den hơ̆ sồng lik klàs rơƀah. Xã lơh geh uă, kơnhoàl lơh geh uă, càr lơh geh uă tơrlòng lơh mờ dŭt ndơl geh cồng nha bơh dơ̆ lam sồr là lơh tam gơl bơta mờng kơlôi mờ neh lơh tam gơl broă lơh bơh làng bol jơi bơtiàn ờ gal cau dê nàng làng bol geh brồ guh lik klàs rơƀah mùl màl kơl jăp”.

Bal mờ ală broă dong kờl geh ai lài bơcri priă, dong kờl bơh Đảng, Dà lơgar dê, Dơ̆ lam sồr “Lơh tam gơl bơta mờng kơlôi, broă lơh bơh làng bol jơi bơtiàn ờ gal cau, lơh làng bol jơi bơtiàn ờ gal cau in brồ guh lik klàs rơƀah kơl jăp” geh càr Kon Tum lơh gam pơgồp bal lơh geh tam gơl niam pràn tàm broă lơh sa mờ rài kis làng bol jơi bơtiàn ờ gal cau tàm càr dê. Nàng dơ̆ lam sồr do pơn jăt tai geh lơh nền nòn, lơh geh cồng nha mùl màl càr Kon Tum pơgồp dơ̆ lam sồr mờ broă lơh jăt ală broă lơh, jơnau lơh nền, jơnau sồr bơh Tỉñ ủy, Anih duh broă Làng bol càr, tàm hơ̆ uă ngan là ală tơngu me gơrềng bal tus broă tơmù rơƀah mờ Broă lơh jơnau kờñ dà lơgar bơ̆t bơtàu ƀòn lơgar pa tàm tiah làng bol jơi bơtiàn ờ gal cau.