VOV4.K’ho - Bơh tàm nùs nhơm gơboh kờñ mờ Bác Hồ, tàm ală ƀòn kòn cau Sơdàng kis tàm càr Kon Tum, broă bơsram mờ lơh jăt ơnà jăk Bác Hồ geh làng bol lơh is mờ lơh sùm. Ồng A Bơ, Bí thư Chi bộ ƀòn Tua Tem, xã Đăk Long, kơnhoàl Đăk Hà, càr Kon Tum là dùl nă cau geh pơnrơ ngan tàm broă bơsram mờ lơh jăt Bác Hồ tàm tiah làng bol kòn cau càr Kon Tum dê.

Ală ngai lồi nhai 8, bơta kòp Covid-19 tàm ală càr hờ đah jum dà lơgar gơtìp kal ke, tàm càr Kon Tum neh geh git nđờ jơ̆t nă cau rê bơh tiah gơtìp kòp mờ geh gŏ mờ virus Sars CoV-2. Tềng đăp mờ bơta di gơlan gơtìp kòp gơtờp tàm mpồl bơtiàn, ồng A Bơ, Bí thư Chi bộ ƀòn Tua Tem, xã Đăk Long, kơnhoàl Đăk Hà sùm tus tơl hìu nàng lam sồr, bơto sồr làng bol lơh jăt broă pơs wàs kloh niam tiah kis, ngui dà rào tê lơh kloh vi khuẩn, pơn chèo pah tŭ lik lòt tàm gùng mờ yal di pal tŭ geh oh kòn ha là cau pròc mhàm rê bơh tiah gơtìp kòp.

                 Ồng A Bơ (đah kiao) tìp măt lam sồr cau dờng sơnam tàm ƀòn Pa Cheng, xã Đăk Long

Tơl jơnau ồng A Bơ đơs, làng bol kis tàm ƀòn Tua Tem ndrờm kah mờ lơh is. Tŭ geh lùp “bơta lơi” lơh bè broă lam sồr geh cồng nha uă, ồng A Bơ ñŏ mờ đơs là ờ geh “bơta lơi”, mìng sền gròi, drơng gàr ai mpồl bơtiàn là làng bol wă gơdê: “Añ sùm kis đềt mềr mờ làng bol, lòt tus tơl hìu nàng lam sồr làng bol, tàm hơ̆ uă ngan là broă kơlôi, broă lơh nàng tơnguh bơtàu broă lơh sa ngai sơlơ dờng pràn. Bè broă tam klăc bal tàm ƀòn ơm kis, bè broă bơsram sră oh kòn in ờ gơtùi ờ geh lơh. Bơ̆t bơtàu rài kis chài rơgơi tàm ƀòn lơh bè lơi nàng làng bol git lơh, git ròng phan, tam phan tơnguh bơtàu broă lơh sa hơ̆ sồng bơsram sră ngai sơlơ gơguh jăk”.

Nam do bŭ lah neh tus 70 sơnam, mơya ồng Bí thư Chi bộ A Bơ kung gam ngai pah ngai gŏ măt tŭ tàm ƀòn hờ đang, tŭ tàm ƀòn hờ đơm. Bal mờ nùs nhơm geh kơnòl, jơh nùs mờ broă lơh bal mờ broă mờng chài bơh dùl nă cau neh geh tŭ là cau pơgru, hơ̆ sồng lơh broă atbồ hìu bơsram kung neh dong kờl ồng uă ngan. Geh gùng dà bơh broă lơh bơto bal mờ jơnau đơs niam, gùng dà broă lơh bơh Đảng, Dà lơgar, bơh gơnoar atbồ ală cấp bơh ồng A Bơ tus mờ làng bol mhar ngan, ƀuơn wă mờ đềt mềr. Mùl màl bè broă lơh jăt gùng dà tơnguh bơtàu Đảng tàm làng bol jăt yàng, Chi bộ ƀòn Tua Tem mờ ồng lơh Bí thư geh 11 nă cau geh đảng den tus 10 nă cau geh đảng là cau jăt yàng.

                  Ồng A Bơ (dơ̆ bàr bơh đah kiao) bơto sồr làng bol tàm broă sơnka sền gàr suơn kơphe

Tàm broă lơh jăt Chỉ thị sồ 05 bơh Bộ Chính trị “Bè chồl pràn broă bơsram mờ lơh jăt ơnà jăk, nùs nhơm, broă lơh Hồ Chí Minh dê”, Chi bộ ƀòn Tua Tem sùm lam lài tàm 9 Chi bộ gơwèt Đảng bộ xã. Bí thư Đảng ủy xã Đăk Long ồng Trần Ngọc Trực pà git: “Đảng bộ đơs niam ngan Chi bộ do broă lơh jăt Chỉ thị sồ 05 niam ngan. Bè broă lơh jăt tus tơl nă cau geh đảng. geh ală broă lơh, uă broă lơh geh cồng nha. Cau geh đảng, làng bol dờp bal niam ngan. Tơn jơh ing 5 nam lơh jăt Chỉ thị sồ 05, Chi bộ mờ să tờm ồng A Bơ geh Đảng bộ xã yal, dan mờ Ban Thường vụ Huyện ủy sền nàng pà sră jờng rơ ai mpồl cau geh đảng bal mờ să tờm bơh Chi bộ do in lơh jăt jăk chài ngan Chỉ thị sồ 05”.

Tơnguh gơnoar bơh să tờm, kra ƀòn, Bí thư Chi bộ ƀòn Tua Tem ồng A Bơ neh geh uă broă pơgồp bal tus mờ broă tơnguh bơtàu bal bơh ƀòn dê bal mờ bơh xã Đăk Long dê. Pơgăp mờ do 7 nam, tŭ xã Đăk Long geh crơng gơs khà hìu jơgloh rơƀah geh rơlao 73%. Tŭ do khà do neh gơmù gam 37,2%. Tàm broă tơnguh bơtàu broă lơh sa, tơnguh rài kis, ồng A Bơ lam lài ndang, tam pà bal jơnau git wă, bơto sồr làng bol bè kỹ thuật tam, sơnka sền gàr kơphe, cao su; rơcang sơndră mờ kòp ai rơpu, kơnrồ, tơnguh bơtàu broă ròng jơrke... ồng A Sự, Chủ tịch UBMT Dà lơgar Việt Nam xã Đăk Long pà git, ƀòn Tua Tem geh 125 hìu kòn cau Sơdàng, ồng A Bơ là cau lam lài tàm broă tơnguh nùs nhơm tam klăc bal, tơrgùm làng bol, là cau lam lài bơh hìu nhă mờ mpồl bơtiàn dê: “Ồng A Bơ ñhăp ñhar ngan mờ ồng kis lam lài nàng oh kòn, kòn sau tàm hìu bal mờ ƀòn lơgar in. Tàm pah dơ̆ pơrjum ƀòn, ồng A Bơ đơs, làng bol dờn ngan”.

Bal mờ rài kis làng bol ngai sơlơ gơguh, ală nam pa do tàm xã Đăk Long, kơnhoàl Đăk Hà, càr Kon Tum, kơnờm mờ ală cau lam lài bè ồng A Bơ, den tàng uă bơta kuơ niam chài rơgơi ờs mờng niam bơnĕ bơh kòn cau Sơdàng geh prăp gàr, tơnguh niam. Xã Đăk Long geh 5 ƀòn den jơh ală ƀòn ndrờm geh lơh hìu rông di mờ bơhiàn kòn cau Sơdàng dê nàng lơh anih pơrjum ƀòn lơgar. Ală mpồl dròng cing, tamya xoang geh sùm mờ bơto wơl ală rơnàng tơnơ̆ do in. Geh ờ uă broă lơh ờs mờng bè tàñ sơ̆, tàñ ồi... gam geh ờ bơta niam ai làng bol kòn cau Sơdàng kis tàm do in tơnguh bơtàu broă lơh sa hìu nhă.

Cau cih KHoa Điềm-Cau mblàng Ndong Brawl