VOV4.K’ho – Tus bal pơrjum cau ala mat mpồl Đảng càr Dak Nông dơ\ 11, ngai òr (24/9), ồng Đinh Thế Huynh, kuang geh jơng tàm mpồl đơng lam Đảng dà lơgar, mơlà kuang atbồ gah bơto pơlam gùng dà broă lơh dà lơgar neh tus jàu priă dong kờl bơsram ai kơnòm bơsram sơrlèt gan kal ke bơsram jak bơh hìu bơsram kòn cau kai 3 N’trang Lơng mờ pà phan sa tềp Trung thu ai kơnòm dềt geh rài kis kal ke tàm càr Dak Nông in.

Đơs tàm dơ\ pà phan, ồng Đinh Thế Huynh đơs tờm, sa tềp Trung thu nam do pơnjat tai tơngume bơh Nhai lơh broă tài kơnòm dềt là “Iat kơnòm dềt đơs”. Den tàng, ală mpồl bal, cau dùl nă să, mpồl lơh sa kă bro, mpồl bơtìan pal pơ gồp bal bơta pràn bơt bơtàu tiah ơm kis tơl niam, ờ do ờ dă, rềp mềr nàng kơ nòm dềt in dờng pràn wil tơl. Ală kơnă Đảng, gơ noar atbồ càr dê pal sền gròi, bơyai lơh uă broă lơh nàng dong kơnòm dềt rơbah, kơnòm dềt geh rài kis kal ke. Ồng Đinh Thế Huynh nting sap ală oh dềt tàm càr wă rò sa tềp Trung thu chờ hờp, ram mhu\, sùm tam klac, sền gròi, dong kờl bal mờ gơp, dipal là kòn gơlòng sồr, kơnòm bơsram jak, sau gơlòng sồr Bác Hồ dê.