VOV4.K’ho – Mho òr, 11/7, tàm hìu lơh broă Đảng dà lơgar, ồng Nguyễn Phú Trọng kuang atbồ đơng lam Đảng dà lơgar neh wă mpồl kuang bàng dờng màng Đảng Cộng sản Hy Lạp bơh ồng Dimitris Kousoumpass kuang atbồ đơng lam Đảng lơgar Hy Lạp lơh kuang atbồ mpồl gam còp mờ lơh broă tàm lơgar Việt Nam. Ồng Nguyễn Phú Trọng đơs tờm gùng dà broă lơh sền dờng màng mờ sền gròi lài ngan tus git gơp mờ ală Đảng, oh mi, gơp bơ yô bơhiàn yau, rề ơnàng git gơp mờ ală Đảng dờng tàm ală lơgar; đơs tờm, Đảng Cộng sản Việt Nam kơp kờ` sền gàr mờ sơlơ tơnguh rlau tai git gơp mờ Đảng Cộng sản lơgar Hy Lạp, lơh geh bơnàng jă gùng dră bal kuơ màng nàng bơtàu tơnguh git gơp lơh broă bal đah 2 lơgar. Ồng Nguyễn Phú Trọng đơs niam ală broă lơh ngan sền gàr gơnoar bơh Đảng Cộng sản Hy Lạp dê tàm gah gùng dră bal lơgar Hy Lạp mờ châu Âu, kung bè bơngă kuơ màng mờ pràn ngan bơh Đảng Cộng sản Hy Lạp dê tus mờ broă bơt bơtàu wơl mờ sơlơ tam klac rlau tai bơh ală Đảng tàm srơh cộng sản mờ công nhân dunia; sồr 2 lơgar pơgồp bal jòi geh bơta pràn tam klac ngan ngồn nàng git gơp lơh broă bal đah 2 lơgar ngai sơlơ bơtàu tơnguh mờ ngan ngồn rlau.