VOV4.K’ho – Mho òr, 23/5, ồng Nguyễn Phú Trọng kuang atbồ đơng lam Đảng dà lơgar neh wă ồng Barack Obama kuang atbồ lơgar Mỹ gam còp ngan ngồn lơgar Việt Nam.

Tàm dơ\ wă, ồng Nguyễn Phú Trọng đơs niam bơta kuơ màng bơh dơ\ tus còp bơh ồng Barack Obama dê, sền do là bơta đơs tờm wơl jơnau pơrgon bơh kuang đơng lam bồ 2 lơgar tus mờ git gơp lơh broă bal tơl làm Việt Nam mờ Mỹ. Ồng Nguyễn Phú Trọng yal ồng Barack Obama in bè cồng nha bơh pơrjum cau ala mat gùt lơgar dơ\ 12 bơh Đảng Cộng sản Việt Nam dê mờ dơ\ te\ khà kuang bàng gơnoar ala mat dà lơgar kơnă 14 mờ mpồl duh broă ala mat làng bol ală kơnă, tơngai lơh broă bơh nam 2016 tus nam 2021, bè gùng dà, broă lơh mờ lơgar ndai bơh Việt Nam dê tàm tơngai pa. Ồng Nguyễn Phú Trọng đơs tờm, Việt Nam pơnjat tai sền Mỹ là dùl tàm ală lơgar lơh broă bal kuơ màng lài ngan mờ đơs tờm, 2 lơgar pal pơnjat tai chul chồl git gơp lơh broă bal tơl làm bơtàu tơnguh, ngan ngồn mờ geh cồng nha, jat bơta sền dờng màng ngap lơngai is, gơnoar tờm, tơl làm ù tiah mờ kơrnuat lơh broă gùng dră bal mờ gơp, ờ tus bal tàm broă dơlam is tơl lơgar dê, tài bơta kuơ bơh làng bol 2 lơgar, tài ngap lơngai, kơ\ kơljap, tam klac, bơtàu tơnguh mờ pas sơm bal tàm kơnhoàl mờ tàm dunia.

Ồng Obama đơs, bơta pin dờn git gơp đah Việt Nam mờ Mỹ geh pơnjat tai bơtàu tơnguh pràn rlau tàm tơngai tus tài bơta kuơ bơh tơl lơgar, tài ngap lơngai, kơ\ kơljap, tam klac mờ bơtàu tơnguh tàm kơnhoàl mờ tàm dunia.

                      Cau cih mờ yal tơngit K’ Duẩn.