VOV4.K’ho - Drim òr 10/02, ồng Nguyễn Tấn Dũng kuang gơs gơnăp gơnoar atbồ hờ đang rơlao jơh dà lơgar bal mờ mpồl kuang bàng tàm Gơnoar atbồ lơgar neh tus sền broă lơh alumin tàm rơndăp broă lơh Bauxit-trà Lâm Đồng tàm kơnhoàl Bảo Lâm, càr Lâm Đồng. Ồng Nguyễn Tấn Dũng neh pơn jờng mờ đơs niam mpồl lơh sa chah mờ phan geh is Việt Nam, anih lơh sa kă bro trà Lâm Đồng mờ gơnoar atbồ tàm do neh sơlèt mờ ală kal ke geh cồng nha lài ngan chờ hờp tàm broă lơh jăt broă lơh mờ đơng lam rơndăp broă lơh. Ồng Nguyễn Tấn Dũng tơnkah mpồl lơh sa chah-phan geh is Việt Nam, anih lơh sa kă bro trà Lâm Đồng pal sền ngăc broă lơh, pơn jăt tai dờp mờ lơh hìu măy geh cồng nha niam ờ do ờ dă. Ồng Nguyễn Tấn Dũng sồr mpồl lơh chah-phan geh is Việt Nam, anih lơh sa kă bro trà lâm Đồng sền gròi rài kis, phan bơna mờ nùs nhơm ai ală kuang bàng, cau lơh broă in, pơgồp bal niam tàm broă tơnguh bơtàu lơh sa-mpồl bơtiàn, tơnguh rài kis làng bol tàm do in; pơn jăt tai lơh niam broă sền gàr bơta lơngăp lơngai, ờ do ờ dă tàm dơlam mờ bơdìh hìu măy.