VOV4.K’ho -  Mho òr (30/11), tàm Hà Nội, ồng Nguyễn Thiện Nhân kuang geh jơng gah gùng dra\ bal dà lơgar,  mờ la kuang atbồ anih duh broa\ gah tề lam gùng dra\ bal dà lơgar Việt Nam neh geh bùi wa\ mpồl kơnòm bơsram Việt Nam tus pơr lòng ala\ dơ\ Olympic dunia mờ ala\ kơnòm  bơsram geh cồng nha jak ngan tàm dơ\ pơr lòng jơh  kai bơsram III dà lơgar nam 2015.

            Nam 2015 la nam geh ua\ ngan khà jờng bơh Olympic dunia bơh kơnòm bơsram Việt Nam mờ 12 gai lòng biàng, 16 gai lòng trà , 6 gai lòng lơ ngô, 3 sra\ jờng. Đơs niam cồng nha lơh geh bơh ala\ oh,  ồng Nguyễn Thiện Nhân đơs la, Việt Nam geh bơta pràn go\ ngan la kòn bơnus tơryang tơryồng, bơceh gơs, bơsram jak. Ala\ cồng nha bơh ala\ oh geh pơ gồp lơh geh rùp sa\ bơh kòn bơnus Việt Nam tàm dunia. Ồng Nguyễn Thiện Nhân kơp kờ` ala\ oh pơnjat tai chồl guh cồng nha geh, bơsram jak, rwah gah bơsram di pal, lơh ngan nàng  ta\ pràn bơt bơtàu dà lơgar. Ồng Nguyễn Thiện Nhân kung kơp kờ` ala\ oh lơh ngan bơsram dà lơgar cau tai, sồr ala\ hìu bơsram tơngguh tai bơto  dà lơgar cau kờ` ala\ oh geh pin dờ` mờ lơh geh ala\ cồng nha jơnhua rlau tai tàm ala\ dơ\ pơr lòng dunia.

                             Cau cih mờ yal tơnggit K’ Brọp