VOV4.K’ho – Mho òr, 28/11, tàm Hà Nội, ồng Nguyễn Xuân Phúc, Kuang gơs gơnap gơnoar atbồ hơđang rlau jơh dà lơgar đơng lam pơrjum Gơnoar atbồ lơgar ờs mờng nhai 11. Tàm pơrjum, ồng Nguyễn Xuân Phúc đơs niam ală kuang bàng tàm Gơnoar atbồ lơgar neh rơcang niam uă tơngume jơnau yal Gơnoar ala mat dà lơgar tàm pơrjum pa do kung bè mblàng mờ hơ jơnau lùp ală bơta mờ kuang bàng Gơnoar ala mat dà lơgar neh lùp. Ală bơta mờ Gơnoar atbồ lơgar yal ndrờm geh Gơnoar ala mat dà lơgar sền sơ wì nền nòn mờ geh bơta ringbal uă. Kơnòl bơh Gơnoar atbồ lơgar dê là pal mhar mut ngui ală kơrnuat bơh Gơnoar ala mat dà lơgar dê, ngan là kơrnuat bè bơtàu tơnguh lơh sa mpồl bơtiàn nam 2017; ồng Nguyễn Xuân Phúc sồr ală kuang atbồ Gah broă lơh tàm Gơnoar atbồ lơgar mhar mut lơh ală jơnau pơrgon tềng đap Gơnoar ala mat dà lơgar. Ồng Nguyễn Xuân Phúc sồr ală kuang bàng tàm Gơnoar atbồ lơgar cribơyai, geh broă bơsong mơ ală bơta ờ niam. Gam 2 nhai tai là tus sa tềp bơhìan, ồng Nguyễn Xuân Phúc kung sồr ală kuang bàng tàm Gơnoar atbồ lơgar cribơyai broă sền gròi sa tềp làng bol in, ngan là làng bol tiah sar lơgar ngài, tiah gơtìp aniai tài bơh trồ tiah lơh aniai bơh tu\ do mơ.

         Cau cih mờ yal tơnggit K’Duẩn