VOV4.K’ho -  Dờp jơnau jà bơh ồng Shinzo Abe kuang gơs gơnap gơnoar atbồ hơđang rlau jơh dà lơgar Nhờk, ngai òr (26/5),  ồng Nguyễn Xuân Phúc kuang  gơs gơnap gơnoar atbồ hơđang rlau jơh dà lơgar Việt Nam  neh sơnđờm dơ\ tus còp lơgar Nhờk mờ tus bal pơrjum G7  rề ơnàng tàm Mie, lơgar Nhờk. Dơ\ lòt bơh ngai  òr  (26/5) tus ngai 28/5/2016. Tơnơ\  43 nam crơng gơs git gơp lơh broa\ bal, Nhờk tu\ do la lơgar ka\ bro dờng dơ\ 4 bơh lơgar Việt Nam mờ  pria\ geh bơh ka\ bro 2 lơgar geh rlau 28 tơmàn dollar tàm nam 2015 mờ di  6 tơmàn 400 tơlak dollar tàm 3 nhai bồ nam do. Bè gùng dra\ bal,  git gơp lơh broa\ bal kuơ màng dờng ơnàng bơh Việt Nam mờ Nhờk pơnjat tai bơtàu tơngguh pràn ngan, tơl làm mờ mùl màl. Tàm hơ\, dơ\ tus còp ngan ngồn bơh ồng Nguyễn Phú Trọng kuang atbồ đơng lam Đảng  lơgar he tus lơgar Nhờk nhai 9/2015, mờ  broa\ 2 lơgar geh “Jơnau đơs bal bè sền gròi bal git gơp Việt Nam-Nhờk”, lơh geh  tềl  go\ kuơ màng tàm git gơp 2 lơgar. Ồng Nguyễn Xuân Phúc kung tus bal pơrjum G7 geh mut lơh ngai òr (26/5), tàm càr Mie, lơgar Nhờk. Pơrjum dơ\ do kung geh cri bơyai bè ua\ ngan tơnggu me  bè chul chồl  gơguh lơh sa gùt plai ù,  bơsong bơta lòng  dunia. Broa\ lơgar Nhờk  dơ\ sơnrờp jà Việt Nam tus bal pơrjum G7 rề ơnàng nam do geh ai go\ bơta pin dờ`,  đơs niam bơnga\  mờ broa\ lơh  bơh lơgar Việt Nam tàm broa\ sền gàr ngap lơngai gùng dra\ bal  mờ ala\ lơgar rềp bal mờ tàm dunia.

          Cau cih mờ yal tơnggit K’ Brọp