VOV4.K’ho- Mho ngai 17/3, tàm hìu lơh broă Chính phủ,  ồng Nguyễn Xuân Phúc Thủ tướng Chính phủ wă Đại sứ Philippines ồng Meynardo Los Banos Montealegre tus còp să. Ồng Nguyễn Xuân Phúc Thủ tướng Chính phủ gờm chờ ồng Meynardo Los Banos Montealegre là Đại sứ Drơng broă lơgar Philippines dê tàm Việt Nam mờ pà gĭt, tàm ală nam pa do, bơta gĭt gơ̆p 2 lơgar bơtàu tơnguh niam bơnĕ ngan tàm uă gah ngan là tàm gah gùng dà lềng. Thủ tướng tơngŏ bơta pin dờn mờ Đại sứ lơgar Philippines geh tơngai lơh broă geh cồng nha tàm Việt Nam.

Thủ tướng kung pà gĭt, Việt Nam tŭ do gam sền gròi niam kòp Covid-19 mờ gơguh lơh sa dương. Do là bơta bươn ngan ai broă bơtàu tơnguh lơh sa- mpồl bơtiàn tàm Việt Nam. Việt Nam sùm sền dờng màng bơta gĭt gơ̆p lơh broă bal jŏ jòng mờ lơgar Philippines, tàm hơ̆ bơta gĭt gơ̆p lơh broă bal tàm gah gùng dà lềng là kuơ màng ngan. Thủ tướng sồr 2 lơgar pal sơlơ tơnguh rlau tai gah kă bro mờ bơcri priă.

Cau mblàng K’ Hạnh