VOV4.K’ho- Drim ngai 16/03, ồng Phạm Bình Minh Phó Thủ tướng, Bộ trưởng Ngoại giao neh cribơyai tàm điện thoại mờ Bộ trưởng Ngoại giao lơgar Cuba ồng Bruno Rodriguez Parrilla nàng cribơyai bè gùng dà broă lơh, broă lơh pơn jat tai tơnguh bơta gĭt gơ̆p lơh bơyô bal, lơh broă bal kuơ màng đah 2 lơgar dê. Tàm dơ̆ cribơyai, ồng Phạm Bình Minh Phó Thủ tướng, Bộ trưởng Ngoại giao đơs nền nùs nhơm ờ tŭ lơi tam gơl bơh Việt Nam dê sùm ơm kềng gah bal tam klăc bal mờ dong kờl lơgar Cuba.

Bộ trưởng lơgar Cuba ồng Bruno đơs là Cuba sền dờng màng mờ kơ̆p kờñ lơh jrô ơnàng rlau tai bơta gĭt gơ̆p ờs mờng kuơ màng mờ lơh broă bal tơl làm mờ Việt Nam, jờng rơ uă ală bơta lơh ngan bơh Việt Nam dê tàm broă rcang sơn dră kòp Covid-19, mơ kung gàr niam khà gơguh lơh sa. Bàr Bộ trưởng Ngoại giao đơs nền, lơh ngan lam lơh ală jơnau hơ kấp kuang bàng dờng màng nàng lơh niam bơta gĭt gơ̆p tam klăc bal, lơh bơyô bal kuơ màng mờ lơh broă bal tơl làm Việt Nam mờ Cuba, lam lơh geh cồng nha broă lơh pơrjum đah 2 lơgar nam 2021.

Cau mblàng K’ Hạnh