VOV4.K’ho – Ngai 27/09/2015, jat jiơ New York, lơgar Mỹ dê, gơ ơm tàm ală broă lơh kềng dơ\ Pơrjum kuang bàng dờng màng Anih duh broă dunia ring bal Broă rơndăp lơh tus nam 2030 bè bơtàu tơnguh kơ\ kơl jăp, ồng Trương Tấn Sang kuang atbồ lơgar neh tus bal Pơrjum kuang bàng dờng màng đơng lam gùt plai ù bè ring bal cau klau cau ùr mờ jàu gơnoar ai cau ùr in. Ồng Trương Tấn Sang đơs là ring bal cau klau cau ùr ờ mìng là dùl jơnau kờn, mờ là broă lơh sùm sàm tàm 17 jơnau kờn bơtàu tơnguh kơ\ kơl jăp bơh Anih duh broă dunia dê; đơs tờm Việt Nam hơ pơrgon geh ai lài jơh ală priă jền kuơmàng nàng bơh tu\ do tus nam 2030 tơrmù bơta tam cah is bè cau klau cau ùr tàm jơh ală broă; lơh cau ùr mờ kơnòm ùr in geh kham sơm kòp, bơsram sră, geh broă lơh mờ ngan là cau ùr tàm ală tiah kal ke; mơkung rơhời tơn jơh broă lơh pờng tus mờ cau ùr mờ kơnòm ùr. Ồng Trương Tấn Sang đơs tờm, Việt Nam geh lơh bal mờ Anih duh broă dunia bal mờ mpồl bơtiàn dunia tàm broă lơh ngan bal kờn lơh geh gơnoar ring bal mờ chul chồl bơta gơguh jak bơh cau ùr dê tàm rài kis gùng dră bal, lơh sa, mpồl bơtiàn tàm jơh ală dà lơgar.

Kung tàm ngai 27/09 sơl, jat jiơ New York, ồng Trương Tấn Sang neh tus bal Pơrjum pah nam Broă bơceh lơh gùt plai ù (CGI) 2015 bơh ồng Bill Clinton kuang atbồ lơgar Mỹ lài do bơyai lơh. Kung tàm do, ồng Trương Tấn Sang neh geh dơ\ tìp mat mờ ồng Bill Clinton. Ồng Trương Tấn Sang đơs niam ngan ală broă lơh geh cồng nha bơh Kes priă Clinton dê tàm lơgar Việt Nam, kuơmàng là tàm broă sền gàr dong kờl mờ sơm kòp HIV/AIDS, kòp mprơm mờ ală kòp lơh bơtờp ndai. Ồng Trương Tấn Sang sồr ồng Clinton mờ Kes priă Clinton sơlơ dong kờl tai ală broă lơh sền gàr dong kờl kòn bơnus, pơgồp bơnah tàm bơta bơtàu tơnguh lơh sa- mpồl bơtiàn tàm Việt Nam.

Cau cih mờ yal tơngi\t- Lơ Mu K’ Yến