VOV4.K’ho - Tàm dơ\ tus  bal dơ\ pơrjum dờng màng Anih duh broa\ dunia, ngai òr (28/9),  ồng Trương Tấn Sang kuang atbồ lơgar neh geh dơ\ tìp ồng Francois Hollande kuang atbồ lơgar Tây. Tàm dơ\ tìp,  ồng Trương Tấn Sang đơs tờm, Việt Nam sền kuơ ngan bơtàu tơngguh mờ lơgar Tây, dùl tàm  cau lơh broa\ lam bồ lài bơh Việt Nam tàm châu Âu mờ tàm dunia. 2 kuang bàng do neh đơs bơta di nùs ngan bè ala\ bơta bơtàu tơngguh niam tàm git gơp bơh 2 lơgar tơnơ\ tu\ Việt Nam mờ Tây geh crơng gơs bơta git gơp lơh broa\ bal kuơ màng tàm nam 2013, ring bal pơnjat tai tơngguh cri bơyai mpồl kuang bàng dờng màng mờ lơh nền nòn rlau tai bè broa\ lơh cri bơyai tam klac bơh 2 lơgar bè bơta kuơ màng, sền gàr ngap lơngai [òn lơgar, sền gàr ngap lơngai dà lơgar, lơh sa. Bè sa\ tờm, Việt Nam geh la  cau tơrbo\ niam ngan kờ` Tây tơngguh git gơp mờ ASEAN. Ồng Francois Hollande  kơp kờ` Việt Nam geh ai mpồl tus bal pơrjum bè tam gơl trồ tiah bơh anih duh broa\ dunia COP21 tàm Paris tàm bồ nhai 12 tus. Ồng Trương Tấn Sang đơs tờm Việt Nam geh ai mpồl tus bal mờ rcang tus bal nhap nhar tàm cồng nha bơh dơ\ pơrjum.

                                      Cau cih mờ yal tơnggit K’ Brọp.