VOV4.K’ho – Pơnjat tai dơ\ tus còp kơnă dà lơgar tus lơgar Việt Nam, ngai òr 06/11, tàm Gơlang kuang atbồ lơgar, ồng Trương Tấn Sang kuang atbồ lơgar neh tìp mat cribơyai broă mờ ồng Tập Cận Bình kuang atbồ đơng lam Đảng, mơ là kuang atbồ dà lơgar.

Ồng Trương Tấn Sang đơs là, ală nam rềp ndo, bơta pin dờn bè git gơp đah 2 Đảng, 2 dà lơgar tàm ờ uă làng bol, kuang bàng, cau geh Đảng neh gơmù tài ală tam pìt tam phà, ală bơta ờ ringbal đah 2 lơgar bè bơta tàm dà lềng đah mattơngai lik kung bè broă ờ uă jơnau ringbal tam klac đah 2 lơgar ờ geh mut lơh tơl làm. Den tàng, ồng Trương Tấn Sang sồr 2 gah pal sơlơ bơt bơtàu nùs nhơm pin dờn gùng dră bal, chul chồl tam klac bal, jơh nùs jòi broă bơsong dipal ală bơta ờ niam. Bơta ờ ringbal đah 2 lơgar bè bơta tàm dà lềng đah mattơngai lik là ngan ngồn, mơya kuơ màng ngan rlau jơh là 2 gah pal sền dờng màng bơta kuơ dipal bal mờ gơp, sền gròi niam ală bơta gơlik geh, pal lơh jat niam ală jơnau ringbal  mờ git wă bal bơh kuang đơng lam bồ dờng màng 2 Đảng, 2 dà lơgar, ringbal cribơyai bơsong ală bơta ờ ringbal dùl bă  dipal, ờ geh broă lơh lơh gobàn kal ke mờ tơnguh bơta tam pìt tam phà, ờ jat broă lơh ling klàng tàm dà lềng đah mattơngai lik.

                                                            Cau cih mờ yal tơngit K’ Duẩn.