VOV4.K’ho – Tàm tơngume tus còp kơnă dà lơgar tus lơgar Tanzania, mho òr nau 09/3, jat jiơ tiah do, ồng Trương Tấn Sang kuang atbồ lơgar neh còp hìu lơh broă Đảng kac màng lơgar Tanzania mờ tìp mat ồng Jakaya Kikwete kuang atbồ Đảng kac màng lơgar Tanzania. 2 gah đơs tờm sền dờng màng git gơp tam klac Đảng đah 2 lơgar geh dong chul chồl tam klac tàm ală gah ndai bè lơh sa, kă bro, bơcri priă. Ồng Kikwete đơs tờm, Tanzania kờ` ngan bơsram mờng chài bơtàu tơnguh bơh Việt Nam dê. Ồng kung sồr 2 Đảng mhar bơt bơtàu 1 jơnau ringbal tam klac ngan ngồn, pà git, mpồl kuang bàng Đảng kac màng lơgar Tanzania bơh ồng Abdukrahman Kinana kuang atbồ mpồl dong broă Đảng lam bồ geh còp lơgar Việt Nam tàm nhai 4 tus do.

                                                        Cau cih mờ yal tơngit K’ Duẩn.