VOV4.K’ho - Mho òr (26/2), tàm Hà Nội, hìu sơnơm Việt – Đức neh bơyai lơh “Tơnkah 61 nam ngai cau lơh sơnơm Việt Nam mờ dờp khà khin cha jăk chài lơh broă anih gây mê mờ hồi sức gah sơm kòp bơdìh să”. Ồng Trương Tấn Sang, kuang atbồ lơgar, mò Nguyễn Thị Kim Tiến, kuang atbồ gah lơh sơnơm dà lơgar, ala măt ờ uă gah, mpồl lơh broă, [òn dờng Hà Nội bal mờ gal kuang bàng, cau lơh broă tàm hìu sơnơm neh tus bal.

Hìu sơnơm Việt – Đức là hìu sơnơm dờng lơgar he dê, là anih tòm sơm kòp bơdìh să lơgar Việt Nam dê. Là hìu sơnơm dờng kuơ màng du\t dơl, là anih dờp sơm kòp ală cau kòp jroă tus bơh ală tiah tàm gùt lơgar mờ là anih bơto jrô ơnàng bè gah sơm kòp bơdìh să, gây mê hồi sức mờ ală gah gơrềng bal. Chờ gờm kuang bàng, cau lơh sơnơm di tàm ngai cau lơh sơnơm Việt Nam dê, ala măt kuang bàng đơng lam Đảng mờ Dà lơgar, Ồng Trương Tấn Sang neh jàu khà khin cha jăk chài lơh broă ai mpồl lơh gây mê hồi sức gah sơm kòp bơdìh să mờ jàu gai lòng lơh broă ai 2 nă cau tàm hìu sơnơm Việt - Đức in neh geh cồng nha jăk chài tàm broă sền gàr bơta pràn kơl dang să jan làng bol.

Đơs tàm dơ\ pơrjum, mò Nguyễn Thị Kim Tiến, kuang atbồ gah lơh sơnơm dà lơgar neh đơs tòm, kờ` geh pơnyờ să dờng màng do, là broă pơgồp bal dờng màng bơh gùt kuang bàng, cau lơh sơnơm bal mờ cau lơh broă tàm hìu sơnơm mờ anih lơh broă do tàm ală rài. Chờ hờp, pơnyờ să mờ ală cồng nha neh geh, tơl mpồl bal mờ ală cau lơh broă tàm hìu sơnơm pal pơn jăt tai lơh ngan chồl pràn broă lơh, kơlôi sơnơng khoa học mờ geh ngui, bơto bơtê mờ lam sồr broă lơh tus mờ ală hìu sơnơm dềt, tam gơl pa nùs nhơm broă lơh, broă drơng cau kòp kờ` mùl màl là anih lam lài gah lơh sơnơm gùt lơgar dê, di pal mờ tàm tiah do mờ dunia dê.

        Cau cih mờ yal tơng^t Ndong Brawl