VOV4.K’ho – Mho òr 30/3, tàm gơlang kuang atbồ lơgar, ồng Trương Tấn Sang kuang atbồ lơgar neh wă ồng Han Myong Sup kuang atbồ mpồl lơh sa kă bro Samsung Việt Nam. Dùl tàm ală mpồl lơh sa kă bro lơh broă tàm gah điện tử geh cồng nha ngan tàm lơgar Việt Nam.

Ồng Trương Tấn Sang sồr mpồl lơh sa kă bro Samsung dong kờl ală mpồl lơh sa kă bro bơh Việt Nam dê tus bal tàm ròt bơta kuơ bơh Samsung dê tài bơta bơtàu tơnguh bơh mpồl lơh sa kă bro mờ bơta kuơ bal bơh dà lơgar dê. Nting sap gờm chờ ală cồng nha bơh mpồl lơh sa kă bro Samsung Việt Nam dê, mờ 2 hìu mai\ lơh broă geh bơcri lơh tàm 2 càr tiah đah tô dà lơgar tu\ do geh rlau 30 tơmàn đôlar Mỹ bè khà tac hờ lơgar ndai, ồng Trương Tấn Sang kơp kờ`, Samsung geh là cau bơcri priă dờng ngan tàm gah điện tử tàm lơgar Việt Nam, lơh ngan geh 50 tơmàn đôlar Mỹ tac hờ lơgar ndai tàm 5 nam tus, bơh hơ\ lơh gơs bơnàng jă nàng ală mpồl lơh sa kă bro lơgar Hàn Quốc rề ơnàng bơta [uơn tam klac bơcri priă tàm lơgar Việt Nam. Ồng Trương Tấn Sang sồr mpồl lơh sa kă bro Samsung gơ hòi ală mpồl lơh sa kă bro lơgar Việt Nam tus bal tàm ròt broă tac phan bơna dong kờl kờ` tơnguh khà phan tac tàm lơgar.

                                                 Cau cih mờ yal tơngit K’ Duẩn.