VOV4.K’ho - Tàm dơ\ tus còp mờ lơh broă tàm lơgar Anh, mho òr (11/9), tàm càr lơgar London, Gah bơto bơtê mờ bơsram dà lơgar Việt Nam neh pơgồp bal mờ anih ala măt lơgar Việt Nam tàm lơgar Anh mờ mpồl duh broă lơgar Anh bơyai lơh pơrjum broă lơh bal gah bơto bơtê mờ bơsram bơh lơgar Việt Nam mờ lơgar Anh. Ồng Vũ Văn Ninh, kuang jăt jơng gơs gơnăp gơnoar atbồ hờ đang rơlao jơh dà lơgar neh đơs loh: Gơnoar atbồ lơgar Việt Nam sền broă bơta cau lơh broă geh khà jăk là 1 tàm ală broă lơh lài ngan tàm broă tơnguh bơtàu dà lơgar mờ tam gơl tòm, tơl ală bơta broă bơto bơtê mờ bơsram lơh kơnòl kuơ màng kờ` lơgar Việt Nam tơrgùm bal mờ dunia tàm tơngai tus. Den tàng, pơrjum do là dơ\ niam kờ` ală kuang bàng đơng lam, ală cau jăk chài lơh broă tàm gah bơto bơtê mờ bơsram cri bơyai bal, tam gơl bal broă mờng chài, ai tơl^k ală broă lơh geh cồng nha kờ` chồl mhar broă lơh bal gah bơto bơtê mờ bơsram bơh 2 lơgar, pơgồp bal tàm broă bơ\t bơtàu mpồl cau lơh broă jăk chài lơgar Việt Nam in.