VOV4.K’ho - Bơh nùs nhơm gơboh, kờñ bơh să tờm dê, geh ờ uă ùr ơruh, klao pơnu kòn cau kis tàm xã Ea Mnang, kơnhoàl Cư̆ Mgar, càr Dăk Lăk neh tam gơl gơs broă lơh nàng mŭt lơh broă. Ală cồng nha lài ngan bơh ală broă lơh do neh cèng geh rài kis să tờm in mờ geh uă ơruh pơnu ndai sền gròi bơsram bal, pơgồp bal tàm broă lam sồr broă mŭt lơh broă tàm ƀòn lơgar.

Bŭ lah gơtìp uă kal ke tài bơh kòp Covid-19 gơtờp uă, mơya tàm nam do, bi Đàm Đình Hiếu, 29 sơnam, kòn cau Tày, kis tàm ƀòn Bình Hoà, xã Ea Mnang kung gam tăc mờ lơgar bơdìh geh ờ uă khà phan lơh kơwào tus drà kă bro lơgar Nhờk mờ lơgar Ấn Độ.

                       Bi Đàm Đình Hiếu mŭt lơh broă mờ nùs nhơm kờñ gơboh mờ kơwào

Bi Đàm Đình Hiếu pà git, tài gơrềng bơh kòp gơtờp, khà phan geh gơtìp kal ke nàng jòi geh mờ broă pơn diang kung gơtìp kal ke sơl den tàng bi mìng dờp ờ uă khà sră dan blơi bơh dunia, gam tai gam tơrgùm tàm broă tăc tàm drà kă bro tàm lơgar mờ ală cau năc ờ gal nàng blơi phan neh geh lơh gơs.

Mờ bi Đàm Đình Hiếu, mŭt lơh broă mờ kơwào là broă lơh di tìp. Lài ngan tài gơboh mờ kờñ să tờm lơh gơs kơwào, den tàng bi Hiếu neh jòi is, bơsram is broă lơh kơwào tàm internet. Tơnơ̆ mờ uă dơ̆ lơh gơtìp ờ geh cồng nha, lơh ờ gơs git nđờ rơhiang nơm, bi neh lơh is kơwào di mờ nùs nhơm kơ̆p kờñ mờ tơlik rùp ală phan neh lơh gơs bơh să tờm dê tàm internet nàng ală mpồl gơrềng bal in sền mờ kơwào tàm pang internet mpồl bơtiàn. Dờp geh jơnau đơs niam bơh ală cau sền gròi, sền gŏ geh bơta niam broă kă bro bơh phan kơwào dê, den tàng bơh nam 2015 bi neh bơcri priă blơi tai măi mŏk nàng lơh kơwào hơ̆ sồng tăc.

Tŭ do, bơdìh mờ broă tăc uă mờ cau dan blơi bơh 1 rơbô tus 2 rơbô nơm pah nhai, bi gam ngui internet mpồl bơtiàn nàng tăc ờ uă phan geh lơh bơh kơwào neh lơh gơs mờ khà 2, 3 rơhiang tus 2, 3 tơlăk đong tơl nơm. Kơnờm mờ hơ̆, den tàng priă geh pah nhai sùm geh bơh 15 tus 20 tơlăk đong. Mờ khà sră dan blơi ngai sơlơ geh uă, bi Hiếu gam kơlôi geh pờ ơnàng broă lơh, blơi tai phan lơh broă nàng lơh, jòi tai cau chài mờ pờ tai ơdŭ bơto uh kơwào nàng pơn jăt tai mờ nùs nhơm kờñ gơboh bơh să tờm dê. Bi Đàm Đình Hiếu đơs: “Tus tŭ do, añ lơh kung neh geh bơh 5 tus 6 nam bloh, lài ngan là ai ală hìu tăc uă mờ geh zalo, facebook, fanpage nàng tăc phan den khà phan geh tàm nhai lơi kung niam. Gùng dà broă lơh tus do den añ geh pờ tai hìu tăc phan uh jơnau đơs crih kòn cau dê mờ geh ai kơwào, pơgồp bal mờ ală bơyô añ dê bơto teh đờng mờ añ geh bơto uh kơwào”.

                                    Bi Hoàng Văn Nam sền gàr iar sar tàm tơngai deh tăp

Kung geh bơh nùs nhơm kờñ gơboh să tờm dê, bi Hoàng Văn Nam, 33 sơnam, kòn cau Nùng kis tàm ƀòn 6, xã Ea Mnang neh rơwah broă ròng iar sar nàng kờñ tăc. Bi Hoàng Văn Nam yal, lài ngan mìng ròng iar nàng sền nhơl, hơ̆ sồng yal mờ ală bơyô, tơlik rùp tàm pang internet mpồl bơtiàn nàng geh tìp bal jăt mờ mpồl cau geh nùs nhơm kờñ gơboh. Tơnơ̆ do, uă cau kờñ jòi tus dan blơi iar sơntìl mờ kơnờm mờ broă tam pà bal broă mờng chài tàm broă sền gàr, bi kung chờ hờp mờ bơtê bơto bal sơl. Bơh bồ nam lài, bi sơn đờm lơh jăt nền nòn mờ ròng uă, tơnguh khà ròng iar dam, iar me tus 100 nơm. Tơnguh khà iar ròng mờ tăc sơntìl, tàm nam do bi neh tăc geh rơlao 30 yô iar sơntìl.

Jăt bi Nam yal, sơntìl iar gam ròng geh lơh bơh iar sar dê, den tàng gam gàr ndrờm bè iar sar sơl, mờ geh ròng tàm tiah mờr ndrờm mờ tàm brê geh is sơl, den tàng geh uă cau kờñ ngan, tơl yô iar sơntìl tăc geh tơnơ̆ mờ 8 nhai ròng geh bơh 800 rơbô tus 1 tơlăk 200 rơbô đong. Bŭ lah ròng iar mìng là broă lơh sa ing, ngui bă ù suơn ơnàng neh geh lài mờ rơlao 1 lồ bal mờ khà phan sa ing geh bơh broă tam phan, mơya di lah pơn drờm bè broă lơh sa den ròng iar sar gam geh kuơ rơlao di lah pơn drờm mờ ală bơta phan ròng ndai. Den tàng, bi gam geh wèt tus pờ uă broă ròng iar sar do. “Ròng iar do den añ gŏ geh bơta pràn sơndră mờ kòp niam ngan, mờ sa ờ uă, phan sa mìng là tơngời mờ kòi. Bè iar kòn den he bơtơl tai ală bơta vitamin nàng geh bơta pràn rơcang sơndră mờ kòp nàng sơrlèt mờ tơngai gam dềt bal mờ bơta pràn rơcang sơndră mờ kòp ờ hềt pràn. Tàm tơngai tus añ geh pơn jăt tai bơ̆t bơtàu mpồl iar mờ khà gal rơlao, lơh tiah ròng dờng rơlao nàng diah kòn ha là phan kă bro di pal mờ broă kờñ tàm drà kă bro dê”.

Jăt bi Nguyễn Văn Mẫn, Bí thư đoàn xã Ea Mnang, kơnhoàl Cư̆ Mgar yal, ală nam pa do tàm xã geh uă broă lơh ơruh pơnu tơnguh bơtàu broă lơh sa, lơh să, lơh broă. Tàm hơ̆ geh uă broă lơh bơh ơruh pơnu làng bol kòn cau tơnguh bơtàu bơh broă kờñ gơgoh pa ngan. Mìng is broă lơh kơwào mờ ròng iar sa là 2 broă lơh bŭ lah pa, mơya lài ngan neh cèng geh cồng nha broă lơh sa niam, cèng geh rài kis ring niam ai ơruh pơnu in den tàng geh đoàn xã sền gròi mờ lam sồr ngan. Bal mờ ală broă lơh bal, dong kờl ai geh bơta ƀuơn bè sră nggal, đoàn xã kung dong kờl bơto pơlam mờ pơgồp bal nàng ơruh pơnu geh tìp mờ priă càn, broă lòt sền, bơsram bal mờ ală broă lơh nàng bơh tŭ hơ̆ geh tai gùng dà mŭt lơh broă, lơh sa ai să tờm in. “Tus do Đoàn xã neh pơlam tàm broă lơh ală sră nggal nàng dan càn priă dong kờl bơh kes priă mŭt lơh broă gơwèt mờ Huyện đoàn mờ bơyai lơh ai đoàn viên ơruh pơnu tàm xã in tus bal sền ală broă lơh do nàng bơsram bal tai broă lơh di pal mờ tơl gah broă bơh đoàn viên ơruh pơnu dê”.

Cau cih H’ Xíu-Cau mblàng Ndong Brawl