VOV4.K’ho - Tàm ntum ua\ ngan kòl yan kal ke Đăk Roong, kơnhoàl rbah Kbang, càr Gia, nàng kơnòm bơsram gơtùi geh lòt bơsram mờ geh bơsram  git sra\ la bơta kal ke ngan. Den mờ bè hơ\,  mờ nus nhơm kờ` gơboh kơnòm dềt, mờ broa\ lơh jơh nùs, lơh ngan  bal mờ broa\ lơh niam, cau pơgru bơh hìu bơsram kòn cau ai ơm ngai tơn  kai I Đăk Roong neh sơrlèt kal ke, rhời bơtàu tơngguh khà niam bơh broa\ bơto mờ bơsram. Kơnòm bơsram slơ ngai slơ bơsram jak, ai mè bèp cau bơsram den kờ` ngan tu\ ai kòn geh lòt bơsram tàm hìu bơsram do. Do la phan bơna kuơ màng ngan tus mờ cau pơgru tàm hìu bơsram ntum tiah sar lơgar ngài do.

Hiù oh Đinh Khang kơnòm  bơsram ơdu\ 4, kòn cau Bahnar, ngài mờ hìu bơsram kòn cau ơm gùl ngai tơn kai I Đăk Roong tus 10 kơi sồ, gùng brê lơm, pal guh kơh,  tia\ dà. Dilah sùm pah ngai lòt gùng ngài tus hìu bơsram, den oh neh pal sang bơsram bơh jo\ ngan. Bơtuah đau la hìu bơsram  geh bơyai lơh bơsram ơm  tơn den tàng Đinh Khang mờ  cau bơsram bal kis ngài bè oh, tàm di gùl nhai, geh tu\ la  dùl, bàr nhai hơ\ sồng geh rê dùl dơ\. Ơm wơl tàm hìu bơsram, oh geh cau pơgru sền gàr mờ bơto bơtê nền nòn ngan, den tàng bơta bơsram sra\ oh dê slơ ngai slơ gơguh jak. Đinh Khang đơs:“Hìu kòn ngài mờ tềng do di 10 kơi sồ. Kòn geh ơm tàm do di 4 nam, cau pơgru sền gròi niam ngan. Kòn bơsram geh sra\ jờng la kơnòm bơsram jak”.

Ua\ ngan tàm rlau 300 na\ kơnòm bơsram kòn cau Bahnar bơh Hìu bơsram kòn cau ai ơm tơn kai I Đăk Roong drờm ơm tơn tàm hìu bơsram bơh ngai dơ\ 2 tus ngai dơ\ 6. Ala\ nhai mìu nhàc, kơnòm bơsram ơm wơl  tàm hìu bơsram 2 poh, geh tu\ tus dùl nhai hơ\ sồng geh rê hờ hiù dùl dơ\. Mờ ala\ oh,  cau pơgru bè cau mè bèp tờm dơ\ 2. Ala\ cau mè bèp kung iang nùs  pơyua oh kòn ơm wơl tàm hìu bơsram. Mò Đinh Thị Hoan geh kòn bơsram  tàm hìu bơsram kòn cau ơm tơn kai I Đăk Roong, đơs:“Mè bèp bè a` sùm mìng lơh broa\  jơng tê lơm, pơyua kòn tàm do den geh pin dờ` rlau. Kơnờm geh bơta dong kờl, sền gròi bơh cau pơgru den tàng bol a` geh pơyua kòn lòt bơsram. Ala\ sau geh anih ơm, anih sa tơn,  bơh bơta atbồ sền gròi bơh cau pơgru”.

Bơta geh bơh ala\ cau pơgru tàm hìu bơsram ơm tơn kai I Đăk Roong gam ua\ ngan al ke, mơya gam jơh nùs drơng sền gàr tus mờ kơnòm bơsram. Pah tu\ rcang mut tàm nhai mriềt pah nam, ala\ cau pơgru neh bơyai lơh ta\ pơ gồp is, lam sồr geh pria\ nàng blơi ào ram pà kơnòm bơsram. Pria\ lam sồr geh ờ ua\,  ala\ cau pơgru geh lòt gùng ngài brê lơm, lòt tus tam gùl kơnhoàl nàng blơi ào pmha tàm  hìu tac phan neh klar, rê pì wơl nàng ala\ oh in geh soh. Ala\ tu\ kơnòm bơsram gơbàn kòp tê jê sa\, cau pơgru pal lơh gơs cau mè, cau bèp, lơh ngan sền gròi.  Bơta rềm pềr mờ kờ` gơboh neh lơh nus nhơm bơh cau pơgru mờ kơnòm bơsram geh rềp mềr rlau, lơh geh bơta pràn nàng ala\ oh geh sơrlèt kal ke tàm rài kis, drơng ngan broa\ bơsram sra\. Ùr pơgru Nguyễn Thị Bích Ngọc bơto ơdu\ 1 tàm Hìu bơsram kòn cau ơm tơn kai I Đăk Roong, ntum Đăk Roong, đơs:

“Bơh tu\ oh mut lòt bơto tàm hìu bơsram  pa crơng gơs do, den bơta gơbàn  ờ tơl srap ngan mờ gơtìp ua\ ngan kal ke, kơnòm bơsram kung rbah  ngan sơl. Tus mờ mpồl bal hìu bơsram den geh bal tam klac bơsong ala\ kal ke. Krơi mờ ala\ bơta buơn boài, tus tềng do ala\ oh geh tam tìp mờ cau pơgru sùm mờ geh rềp mềr rlau. Ngan la bơh bơta hơ\, neh chul chồl  oh geh tai bơta nàng sùm bơto sra\.”.

Gơ ơm tàm tiah brê bơnơm, di ntum ua\ ngan kòl yan kal ke Đăk Roong, ngài mờ tàm gùl kơnhoàl Kbang di 70 kơi sồ, mơya hìu bơsram kòn cau ơm tơn kai I Đăk Roong gam mpờl go\ ngan la hìu bơsram tơlir, kloh niam mờ tơl ala\ anih nhơl, anih bơsram, anih ơm rlô,  ai tus 300 na\ oh bơsram. Geh bơta niam bè hơ\,  ala\ cau pơgru tàm do neh  sùm lơh ngan, ta\ pria\ jền ndang, roh dà kơlhề ndang, mờ geh hòi jà mpồl bơtìan lơh bal ndang, trơ gùm geh ua\ ngan  bơta tàm càr mờ bơh càr cau nàng lơh. Khà bơto bơsram tàm do kung geh bơtàu tơngguh bơh pah nam mờ tu\ do neh gơ gơs la anih àng bè broa\ hìu hìu bơsram ai ơm tơn bơh kơnhoàl Kbang mờ càr Gia Lai. Ồng Phạm Quốc Tuấn, atbồ hìu bơsram đơs:“Bơh bơta lơh ngan jơh nùs bơh bol a` dê, bơh broa\ lơh ngan drơng kơnòm bơsram.  Bơh  bơta hơ\,  den mpồl bơtìan neh geh sền dờp mờ dong kờl bal. Bơh ala\ mpồl bơh [òn dờng Hồ Chí Minh hơ\ sồng ala\ anih,  khi klo geh, go\ geh bơta ta\ pơ gồp ngan bơh cau pơgru, khi neh dùl tê bal nàng lơh geh hìu bơsram do”.

Di tu\ chờ ngai cau pơgru Việt Nam 20/11 pa do,  tàm ntum rbah tiah sar lơgar ngài Đăk Roong geh lơh  balhia\, ìol ngan. Phan pà bơh ala\ cau pơgru mìng la ala\ ntê bơtàu hòn is tàm brê,  ờ geh bơta lơi ờ. Mơya, mờ ala\ cau pơgru tàm hìu bơsram, bơta trơyang, trơyồng bơh kơnòm bơsram, gơguh jak khi dê mờ bơta di nùs bơh ala\ cau mè bèp la phan  pà kuơ màng ngan. Hơ\ la cồng nha dà kơlhề lơh ngan bơh ala\ cau pơgru bơh pah nam jơh nùs tài kơnòm bơsram kờ` gơboh,  tài rài bơto bơtê mờ bơsram tàm tiah sar lơgar ngài tàm ntum Đăk Roong.

                   Cau cih mờ yal tơnggit K’ Brọp