VOV4.K’ho - Tàm kơnhoàl Cư\ Ju\t, càr Dak Nông, anih lơh sa kă bro dà toh khoah nà` Việt Nam (Vinasoy) neh pơgồp bal mờ anih lơh broă kơlôi sơnơng công nghệ sinh học khoah nà` lơgar Mỹ - Hìu bơsram dờng Missouri (NCSB) pa bơyai lơh pơrjum cri bơyai khoa học dunia mờ tơngu me “Ngui công nghệ pa mờ ndrờm bal tàm broă lơh niam ờ do ờ dă mờ tơnguh bơtàu khoah nà` Tây Nguyên”.

Tàm pơrjum cri bơyai, ală cau jăk chài geh pơnrơ ngan gah lơh sa suơn sre mờ công nghệ sinh học neh tam pà bal ală broă ngui công nghệ pa ngan tàm broă rơwah sơntìl kung bè crơng gơs broă tam sền gàr ndrờm bal kờ` tơnguh bơtàu kơl jăp tiah tam khoah nà` Tây Nguyên. Đơs tàm pơrjum ồng Ma Quang Trung, kuang atbồ đah tam phan, gơwèt gah lơh sa mờ tơnguh bơtàu [òn lơgar dà lơgar neh sồr ală gah, mpồl lơh broă, ală càr tàm Tây Nguyên pal chồl mhar broă bơyai lơh, tơnguh broă pơgồp bal bơh làng bol bal mờ anih lơh sa kă bro bal mờ cau jăk chài, mờ bơ\t bơtàu broă lơh kờ` dong kờl broă lơh do lơh geh cồng nha.

       Cau cih mờ yal tơng^t Ndong Brawl