VOV4.K’ho – Mờ tơngume “Tam klac bal bơ\t bơtàu Mpồl cau lơh bău càr pràn kơldang, kơ\ kơl jăp, tơnguh jơnhoa bơta niam mờ cồng nha lơh broă Mpồl lơh geh jơnau sồr kơnòl broă tàm tu\ tơngai pa”, ngai òr 12/06, Mpồl cau lơh bău càr Dak Lak neh tơn jơh Pơrjum dơ\ VI, tơngai lơh broă bơh nam 2015- 2020, mờ 158 nă cau tàm mpồl tus bal. Lơh jat kơrnoat sồr sồ 37 bơh Mpồl đơng lam Đảng dà lơgar dê bè “Pơn jat tai tơnguh jơnhoa gơnoar broă, kơnòl broă, cồng nha bơh Mpồl cau lơh bău Việt Nam dê tàm tu\ tơngai pa”, Mpồl cau lơh bău càr Dak Lak neh lơh kơ\ kơl jăp, lơh niam wơl mpồl kuang bàng đơng lam, ai broă lơh bơh mpồl dê gơ jat gùng gơ jat dà mờ lơh geh uă cồng nha.

Ồng Y Phu geh jơnau đơs tàm dơ\ pơrjum

Pơrjum neh ring bal gùng dà broă lơh mờ kơnòl broă tàm tơngai lơh broă bơh nam 2015- 2020, pồ Mpồl duh broă đơng lam Mpồl cau lơh bău càr Dak Lak kơnă VI, mờ 9 nă kuang bàng. Ồng Y Tuynh Kmăn là cau lơh bău pơn jat tai geh pồ lơh gơnoar broă Kuang atbồ Mpồl cau lơh bău càr Dak Lak kơnă VI, pà gi\t: “Tơngai tus do, Mpồl cau lơh bău càr geh sền dờng màng broă tơnguh jơnhoa jơnau gi\t wa\ gùng dră bal, bơsram tàp nùs nhơm bồ tơngoh bơh cau lơh bău mờ cau tàm mpồl dê, nàng lơh bè lơi cau tàm mpồl geh nùs nhơm bồ tơngoh gùng dră bal pràn kơldang kơ\ kơl jăp, mờ nùs nhơm bồ tơngoh niam nàng mu\t lơh kơnòl broă mpồl bơtiàn mờ kơnòl broă cau làng bol tàm lơgar bơh cau lơh bău dê”.