VOV4.K’ho – Drim ngai 10/9, tàm Hà Nội, Bộ Nội vụ pơgồp bal mờ kes pria\ khà kờp làng bol Liên hợp quốc tàm Việt Nam bơyai lơh pơrjum lam lơh jat Adat Ơruh pơnu nam 2020 tus ală bộ, gah broă lơh mờ 2, 3 anih lơh broă tàm dà lơgar.

Tàm pơrjum, mò Naomi Kitahara, Kuang ala mat Kes pria\ khà kờp làng bol Liên hợp quốc tàm Việt Nam đơs, Adat Ơruh pơnu nam 2020 geh cèng wơl tơngume adat boh lam geh kuơ tàm broă pơlam ai tơlik gùng dà, broă rơndap lơh mờ lam lơh jat ală broă lơh mờ bơta dong kờl ơruh pơnu bơh Chính phủ dê ai ơruh pơnu Việt Nam in.

Đơs tàm pơrjum, ồng Nguyễn Văn Tuyết, Phó Chủ nhiểm Ủy ban niam chài bơto bơtê ơruh pơnu kơnòm pa tàu mờ kơnòm dềt bơh Quốc hội dê sồr: Bộ Nội vụ mhar cribơyai mờ Chính phủ, ai tơlik ală sră nggal pơlam lơh jat jơnau cih bơh adat boh lam dê, cih mùl màl broă lam lơh jat Adat Ơruh pơnu. Tàm hơ\, geh broă lơh jat ngan ngồn ală broă lơh dong kờl bơh dà lơgar dê gơ wèt tus mờ ơruh pơnu, kơnòl lam lơh jat bơh tơl anih lơh broă dê geh cih tàm adat boh lam.

Cau mblàng K’Duẩn