VOV4.K’ho - Drim òr (16/03), tàm hìu lơh broă Chính phủ, Thủ tướng ồng Nguyễn Xuân Phúc đơng lam pơrjum pờ tơlĭk tàm internet gùt lơgar tơn jơh 5 nam broă lơh bơh mpồl lơh broă Thủ tướng Chính phủ.

Mờ gùng dà broă bơ̆t bơtàu Chính phủ lơh broă niam, bơceh lơh, lơh broă, drơng làng bol mờ mpồl lơh sa kă bro, Thủ tướng neh geh broă bơceh lơh mpồl lơh broă bơh Thủ tướng tàm nhai 8 nam 2016 mờ mpồl neh pơgồp bal kuơ màng nàng lơh jăt broă lơh bơh Chính phủ. Đơs niam mpồl lơh broă neh lơh jăk kơnòl Thủ tướng jào, Thủ tướng đơs là, Mpồl lơh broă neh ai geh bơta kuơ màng, pơgồp bal niam tàm cồng nha tàm broă đơng lam bơh Chính phủ, Thủ tướng Chính phủ tàm tơngai lơh broă do.

Mơya, Thủ tướng sồr ală bộ, ală càr, ƀòn dờng bañ sền ờ sơ̆p, bañ gờñ di nùs mờ cồng nha neh lơh geh, pal pơn jăt tai đơng lam, chồl pràn broă lơh jăt kơnòl geh jào. Ală bộ, trưởng pal lam sồr bơsong gơs dồs gam gơlời sră nggal cih nền nòn, jào ală bơta niam bơnĕ ngan ai tơngai lơh broă Chính phủ pa in.

Cau mblàng Ndong Brawl