VOV4.K’ho - Tàm tiah mpồng nhàr đah Tây Nguyên tơrbŏ mờ ală càr hờ đah jum dà lơgar-do là tiah kòp Kovid-19 gơtờp uă ngan tàm nam 2021, mơya càr Dăk Nông neh lơh jăt niam ală broă rơcang sơndră, kơrian kòp gơtờp. Càr Dăk Nông là dùl tàm bàr càr geh khà cau gơtìp kòp Kovid-19 ờ uă ngan tàm Tây Nguyên, khà cau gơtìp chơ̆t gơwèt mpồl ờ uă ngan gùt lơgar dê. Cồng nha do là kơnờm mờ broă ring nùs bal bơh làng bol bal mờ ală mpồl lơh broă cíñ trị, tàm hơ̆ pal đơs tus ală kwang bàng lơh sơnơm tàm tiah sơnrờp tam dră mờ kòp gơtờp. Ală cau do neh ơm ing ală bơta chờ is nàng jơh nùs pơgồp bal tàm broă kơrian geh cồng nha kòp gơtờp tàm càr Dăk Nông, dùl càr gam uă kal ke tàm Tây Nguyên dê.

Bơh nhai 7 nam 2021, tŭ kòp kovid-19 gơtờp tàm càr Dăk Nông tus tŭ do, Dược sỹ Bùi Thị Tuyết bal mờ ală kwang bàng mpồl lơh sơnơm ai mẫu mpồl bơtiànAnih tờm gròi sền kòp gơtờp càr Dăk Nông yal, ờ geh dùl ngai lơi ơm rơlô.

                                            Lŏ Bùi Thị Tuyết gam ai mẫu xét nghiệm

Lŏ pà git, geh tŭ ni sơna nggùl bơnăng dờp jơnau cau hòi điện thoại là pal lòt mơ. Mờ uă dơ̆ ngan ală lŏ cau ùr pal lơh jăt broă ai mẫu gùt mang tơn nàng di tŭ drơng tàm broă jòi, wàng se kơrian kòp gơtờp. Jơh ngai lơh broă tàm phan soh ndơ̆p, geh ờ uă cau lơh broă bal mờ lŏ neh gơtìp duh ir. Dược sỹ Bùi Thị Tuyết yal: “Geh tŭ kung dil ngan sơl tài añ kung geh kòn gam dềt, geh hìu nhă ndrờm bal mờ ală cau dê sơl. Mơya tài jơnau kờñ bal, tài kòp gơtờp gơtìp kal ke ir, añ kung ndrờm bè ală cau tàm mpồl ndrờm lơh ngan nàng gơtùi pơgồp bal tàm broă kơrian kòp gơtờp. Kung kơ̆p kờñ ală cau geh dùl satềp niam, chờ ờ do ờ dă mờ tơrgùm bal mờ cau tàm hìu nhă, ală cau pal lơh jăt niam jơnau sồr 5K, mờ sùm tơnguh nùs nhơm rơcang lài, bañ sền ờ sơ̆p”.

                Bơta tơngŏ glar bòl bơh ală cau lơh sơnơm tơnơ̆ mờ dùl mang jòi xét nghiệm

Tàm khoa xét nghiệm-Anih tờm gròi sền kòp tê jê să càr Dăk Nông, tàm ală ngai do, 19 nă kwang bàng cau lơh sơnơm kung pal “sơbì” hìu nhă ing nàng jơh nùs mờ broă lơh. Thạc sỹ Nguyễn Phước Phúc, Kwang atbồ khoa xét nghiệm pà git: “Lơh bè lơi nàng tơl pràn xét nghiệm bơh 2 rơbô tus 3 rơbô mẫu, ndrờm mờ bơh 7 rơbô tus 8 rơbô nă cau geh ai mẫu xét nghiệm pah ngai, den uă oh mi cau ùr tàm khoa, anih lơh broă, ndrờm là pal sơbì jơh broă hìu nhă tờm nàng ơm lơh broă tàm anih lơh broă ngai kung bè mang. Mờ geh ală mang mờ bol añ lơh gùt mang tơn nàng di pal mờ broă rơcang sơndră mờ kòp gơtờp tàm càr, tàm hơ̆ uă ngan là ală dơ̆ gơtờp mờ khà cau gơtìp kòp uă tàm Gia Nghĩa, Krông Nô, Dăk Mil, Cư̆ Jút tơngai lài do”.

                            Sơm kòp cau kòp kovid-19 gơtìp jroă tàm hìu sơnơm càr Dăk Nông

Pa rê tơnơ̆ mờ 2 nhai tam dră mờ kòp gơtờp tàm Hìu sơnơm Chợ Rẫy-ƀòn dờng Hồ Chí Minh, Bác sỹ Lê Văn Thương pơn jăt tai mŭt lơh broă jŏ jòng tàm Tiah sơm kòp Kovid-19 jroă mờ ngòt rơngơ̆t-Hìu sơnơm càr Dăk Nông. Ờ kờñ đơs uă bè să tờm, bác sỹ pà git gam tam jào broă jồr mhàm sùm ai ală cau lơh broă bal in mờ kơ̆p kờñ geh gàr rài kis ai uă cau kòp klàs bơh kòp Kovid-19 dê: “Lơh ngan jơh pràn, lời ing ală jơnau kơ̆p kờñ să tờm is nàng lơh jăt broă tam dră mờ kòp gơtờp, den tàng là nùs nhơm lơh broă geh uă ngan. Tơnơ̆ mờ tŭ lòt tus tàm hìu sơnơm Chợ Rẫy rê den añ dờp geh uă dùl bơta là cau kòp Kovid-19 jroă di lah geh lơh jăt broă jồr mhàm sùm mờ lơh jăt gờñ den broă geh dong klàs uă rơlao mờ geh tơmù khà cau gơtìp chơ̆t. Bơta chờ ngan là ală oh mi bơh ală khoa ndai bŭ lah ờ di jăt broă lơh, mơya ală oh mi do kung gam bơsram bal mờ tơnơ̆ mờ dùl tơngai den ală cau do geh lơh broă niam ngan, den tàng kung tơmù kal ke ai să tờm añ dê”.

Tềng mpồng hờ đah jum Tây Nguyên, tàm rơlao 1 nam do, càr Dăk Nông sùm gơtìp tàm bơta gơtờp uă kòp kovid-19. Mơya, mŭt tàm nam 2022, tơnơ̆ mờ càr Kon Tum, càr Dăk Nông là càr geh khà cau gơtờp kòp kovid-19 ờ uă dơ̆ bàr tàm Tây Nguyên dê. Tàm hơ̆, khà cau gơtìp chơ̆t tàm càr di pơgăp 0,25%, gơwèt tàm mpồl ờ uă ngan gùt lơgar dê. Đơs bè broă rơcang sơndră mờ kòp kovid-19 tàm càr do, ồng Ngô Thanh Danh, Ƀí thư Tỉñ ủy Dăk Nông đơs là, càr neh geh mờ rơcang lài tàm broă sền gròi kòp là kơnờm mờ broă tam klăc bal, ring bal, dùl nùs tam pà bal bơh làng bol bal mờ broă đơng lam, broă tus bal pràn bơh jơh ală mpồl lơh broă cíñ trị, tàm hơ̆ uă ngan là ală broă pơgồp bal bơh ală mpồl lơh broă tàm tiah sơnrờp tam dră mờ kòp gơtờp: “Bol añ neh ai bơh sơnrờp tơn là dùl càr rơƀah, kal ke uă bơta, geh bal cau lơh broă bal mờ phan lơh broă, geh bal tàm gah lơh sơnơm kung gam ờ tơl uă ngan cau lơh broă, den tàng pal rơcang mờ ală broă lơh broă, tàm ală tiah lơh broă là wàng se kơrian kòp gơtờp sơlơ mhar sơlơ niam, bañ lời tus tàm tŭ neh gơtờp kòp bè ală càr ndai den ờ tơl pràn. Ală broă lơh glar bòl, kal ke, cau kòp neh glar den cau tus tam dră mờ kòp sơlơ glar bòl rơlao tai, lời ing ală broă lơh să tờm nàng drơng broă lơh bal, hơ̆ là dùl broă lơh niam bơnĕ ngan”.

Satềp nam pa tus, tàm tŭ ală cau chờ wă rò nam pa, bal mờ ală mpồl tam tiah sơnrờp tam dră mờ kòp gơtờp, ală kwang bàng lơh sơnơm gam lơh broă sùm tàm phan soh sền gròi să jan gơtìp hăt hal ngan, lời ing bơta chờ să tờm, lơh ngan ai mẫu, jòi, sơm kòp cau kòp in..., pơgồp bal tàm broă gàr làng bol in satềp niam ờ do ờ dă, gơdờp bal di pal tềng đăp mờ kòp kovid-19 gơtờp.

Cau cih Minh Huệ-Cau mblàng Ndong Brawl