Ƀák sĩ ồng Y Nham Niê, Kwang atbồ Hìu sơnơm xã Krông Na, kơnhoàl Buôn Đôn, càr Dăk Lăk gam ngai mang lơh broă tàm ƀòn lơgar nàng dong kờl, sền gàr pràn kơl dang să jan làng bol tiah nhàr lơgar in là dùl nă cau pơn rơ ngan bè hơ̆.

Bè ală ngai bè ờs sơl, ngai 16 pah nhai, ƀák sĩ Y Nham Niê, Kwang atbồ Hìu sơnơm xã Krông Na, kơnhoàl Buôn Đôn den bal mờ ală kwang bàng, cau lơh sơnơm mut tàm ƀòn Đrăng Phốk, xã Krông Na nàng kham kòp, bơto pơlam pràn kơl dang să jan ai làng bol in. Ƀòn Đrăng Phốk ơm tàm dơlam tiah tờm brê dà lơgar York Đôn, ngài pơgap mờ Hìu sơnơm xã dê mờr 20 kơi sồ, den broă lòt tus Hìu sơnơm xã nàng kham kòp gơ tìp uă ngan kal ke. Tơl dơ̆ lòt tàm ƀòn, ƀák sĩ Y Nham sùm lời tŭ tơngai mblàng yal broă lơh rcang sơndră kòp ai làng bol in.

Ƀák sĩ Y Nham Niê đơs: Tàm tiah sar lơgar ngài do den kòp jê uă ngan, ngan là kòp mprơm noăt gam geh sơl, geh tai pa do là ală bơta kòp ndai bơtờp bơh tiah ndai tus kung geh uă sơl. Bơta gĭt wă làng bol dê là ờ hoan geh, làng bol gĭt kòp den hơ̆ sồng lòt kham mờ ƀák sĩ lơm, ai broă rcang sơndră kòp den làng bol ờ hoan gĭt ngan.

Lài do, ală cau lơh broă bal gah lơh sơnơm tàm thôn, ƀòn pal lòt tus tơl nơm hìu nàng tơngkah làng bol in tơngai lòt kham kòp pah nhai, den tŭ do, tus ngai 16 pah nhai, làng bol tus is tàm hìu niam chài mpồl bơtiàn dê nàng geh kham mờ bơto pơlam pràn kơl dang să jan. Bi H’Thép Knul ơm tàm ƀòn Đrăng phốk, pà gĭt: Ƀák sĩ Nham mŭt tàm do kham kòp, bơto pơlam mờ ƀòn lơgar tàm do in jơh nùs ngan, kơnờm geh ƀák sĩ den ƀòn lơgar gĭt sền gròi is pràn kơl dang să jan.

Là kòn cau Rơđê deh mờ dờng tàm ù tiah xã Ea Bar, kơnhoàl Buôn Đôn, tơnơ̆ tŭ jơh bơsram gah Y Khoa, nam 2002, bi Y Nham Niê dờp lơh broă tàm Hìu sơnơm xã  Ea Bar. Bơh nam 2016 tus tŭ do, ƀák sĩ Y Nham geh ntrờn rê lơh Kwang atbồ Hìu sơnơm xã Krông Na. Rlau 20 nam đềt mềl mờ broă lơh mờ neh geh 7 nam lơh broă ngài mờ hìu ơm rlau 20 kơi sồ, rlau mờ cau lơi jơh, bi wă ngan là rài kis bơh làng bol tiah sar lơgar ngài, tiah nhàr lơgar gơtìp uă ngan kal ke; kung gam geh uă bơhiàn rài kis bơr ngơl gơla gơrềng ờ niam tus pràn kơl dang să jan bơh làng bol dê.

Mờ ală jơnau gĭt wă neh geh bơsram mờ jơh nùs ngan mờ broă lơh, ƀák sĩ Y Nham ờ rngòt bòl glar gùng lòt kal ke, ngai trồ tơngai kung bè ngai trồ mìu, jơh nùs sùm bal mờ cau lơh broă bal mờ mpồl lơh broă bal gah lơh sơnơm dê hòi jà làng bol sang tĕ bơhiàn yau bơr ngơl gơla, bơto pơlam sền gròi pràn kơl să deh dùh, hòi jà mè bèp jun kòn se lòt cĭt sơnơm rề ơnàng di mờ tŭ tơngai. Kơnờm bơta pơnđơl pràn lơh ngan bơh ƀák sĩ Y Nham dê mờ mpồl cau lơh sơnơm tiah do dê, broă lơh sền gròi pràn kơl dang să jan bơh chờm ai làng bol tàm xã Krông Na lơh geh uă cồng nha. Khà deh kòn dơ̆ 3 mờ jơnau bau gờñ, bau mờ cau pròc mhàm bal tàm tiah do dê gơmù uă ngan, khà cĭt sơnơm rề ơnàng lơh geh rlau 70%. Ƀák sĩ Y Nham đơs: Nùs nhơm bơh he dê kwơ màng ngan là sền gròi pràn kơl dang să jan ai ală cau in, ờ gŏ tam cah is tiah do tiah ne ờ, làng bol mờ kờñ, dà lơgar sồr ntrờn là he lòt lơm. He mìng sùm pơnđơl pràn lơh ngan ai ală jơnau neh bơsram, bơta mờng chài bơh he dê nàng drơng broă làng bol in lơm.

Ờ mìng tryang tryồng tàm broă sền gròi pràn kơl dang să jan ai làng bol in, mờ gơnoar broă là Kwang atbồ Hìu sơnơm xã, ƀák sĩ Y Nham gam crang geh broă rơndap lơh geh ngan ai tơl broă lơh bơh Hìu sơnơm dê jat tơl poh, tơl nhai kung bè rcang lài tàm broă yal tơngĭt lài ală bơta kòp jê tàm tiah do in nàng geh ală jơnau đơs, jơnau dan di tŭ mờ kấp hơđang. Bơdìh hơ̆, ƀák sĩ Y Nham gam jơh nùs ngan bơto pơlam ai ală cau lơh broă tàm Hìu sơnơm in nàng khi in tơnguh uă bơta chài tàm broă lơh. Bi Y Sới Hwing, Phó Kwang atbồ Hìu sơnơm xã Krông Na pà gĭt: Ƀák sĩ Nham là dùl nă cau jơh nùs ngan, lơh broă geh kơnòl ngan. Pah nhai tơnơ̆ tŭ pơrjum Ci ƀộ tŭ lơi ƀák sĩ Nham kung đơs geh dùl bơta kòp lơi hơ̆ nàng mblàng yal, nàng ai tơlik gùng dà broă lơh tŭ gơtìp ală bơta gơlik geh, ƀák sĩ kung neh bơto pơlam lài, bơta chài bơh ƀák sĩ dê, geh tŭ den ƀák sĩ  rcang bơto bơtê bơta chài he dê ai ală oh mi tàm Hìu sơnơm in, nàng tŭ mờ ƀák sĩ lòt tiah lơi den oh mi tàm Hìu sơnơm kung gơtùi bơsong geh sơl.

Ală bơta tă pơgồp dà kơl hề bơh ƀák sĩ Y Nham Niê dê geh sền dờng màng ngan, bi ờ mìng là dùl nă ƀák sĩ jak ngan bè broă lơh ờs mờng, broă lơh, ờ mìng bềng lìu nùs nhơm niam cau lơh sơnơm dê lơm mơ gam là krơh niam tàm gah lơh sơnơm tiah nhàr lơgar dê. Ngan là kơnờm bơh bơta bơt bơtàu mờ gàr geh bơngă pin dờn nàng lơh geh nùs nhơm pin dờn, kờñ gơboh bơh làng bol dê neh dong ƀák sĩ Y Nham lam lơh geh cồng nha ală broă lơh gah lơh sơnơm dà lơgar bè thôn, ƀòn dùl bă geh cồng nha.