Tàm khà hơ̆ geh 4 nă oh dềt chơt tàm dơ̆ bŭ dà gơlik geh tàm mang ngai rlô (19/5), tàm xã Phú Hội, kơnhoàl Đức Trọng, càr Lâm Đồng. 4 nă kơnòm bơsram bơh 6 tus 10 sơnam, tàm jà gơp lòt hờ tơnau dà ngkwòi hìu ƀưu điện xã Phú Hội um. Tàm tŭ um, 1  nă oh gơtìp ntiar jơng bŭ dà. 3 nă oh gam wơl lơh ngan dong mơya kung gơtìp bŭ dà sơl.

Kung tàm ngai rlô (19/5), tàm xã Ea Tih, kơnhoàl Ea H’leo, càr Dăk Lăk, 2 nă sau dềt mìng rơp pa 4 sơnam mờ 5 sơnam kung geh cau pròc mhàm tờm git gŏ chơt tàm tơnau dà thôn 4, xã Ea Tih. Dơ̆ bŭ dà dơ̆ 3 gơlik geh tàm xã Ea Kao, ƀòn dờng Buôn Ma Thuột, càr Dăk Lăk lơh 2 nă oh dềt ndrờm ơm tàm ƀòn H’Đơk, xã Ea Kao chơt. Jơnau gơlik geh bŭ dà geh đal git là tài trồ tơngai duh, ală sau tàm jà gơp mut tàm tơnau dà bơh làng bol tờ tàm mìr nàng um mờ gơtìp bŭ dà. Tŭ do, gam mờr mut tàm tơngai ơm rlô bơkang, gah lơh broă geh gơnoar sồr mè bèp pal sền gròi oh kòn nền nòn rlau nàng tơrmù lơyah ngan rlau jơh ală dơ̆ rềs àr sồt să, tàm hơ̆ geh bŭ dà.