VOV4.K’ho - Jăt khà kờp bơh Anh tờm gròi sền kòp tê jê să càr Dăk Lăk yal, bơh bồ nam tus ngai 31 nhai 7, càr Dăk Lăk neh dờp geh 2 rơbô 450 nă cau gơtìp mờ kòp sốt xuất huyết, gơguh 5,1 dơ̆ pơn ndrờm mờ tŭ do nam 2021, geh 1 nă cau gơtìp chơ̆t.

                    Dùl nă cau kòp sốt xuất huyết gam sơm kòp tàm hìu sơnơm kơnhoàl Ea Súp

Tàm hơ̆, kơnhoàl Ea Súp geh gŏ khà cau gơtìp kòp sốt xuất huyết uă ngan mờ 297 nă cau, pơn jăt mờ hơ̆ là kơnhoàl Krông Păc mờ 267 nă, ƀòn dờng Buôn Ma Thuột 258 nă mờ kơnhoàl Buôn Đôn 214 nă. Tŭ do, 15 kơnhoàl, thị xã, ƀòn dờng neh gŏ 140 tiah gơtìp kòp sốt xuất huyết. Mpồl lơh sơnơm neh lơh kloh mờ broă ƀồm sơnơm, pơs wàs kloh niam tiah kis. Gah lơh sơnơm yal lài, tơngai gơtờp uă ngan bơh kòp sốt xuất huyết geh tàm nhai 8 do. Mò Ngô Thị Minh Trinh, Phó Củ tịc UɃÑZ kơnhoàl Krông Păc pà git: kơnhoàl neh đơng lam mpồl lơh sơnơm mờ ală xã lam sồr làng bol bè: bĭc tàm kơmùng, gơsơ̆t kih dà, pơs wàs kloh niam tiah kis nàng tơmù kòp gơtờp.

Cau mblàng Ndong Brawl