Uă nam do,a lă kơnòm bơsram bơh Anih tờm Hy Vọng tàm hìu sồ 82/198, gùng 290 Kim Mã Ba Đình, Hà Nội neh kwèng bơh rùp hin ƀák sỹ Đỗ Thúy Nga tus mpồng anih tờm tàm tŭ 8 jơ drim ngai dơ̆ 2, dơ̆ 4 mờ dơ̆ 6 pah poh nàng sơn đờm broă đơng pơlam anih tờm bơto bơtê, lơh niam ală kơnòm bơsram gơtìp ờ niam bồ tơngoh in. Anih tờm Hy Vọng pờ mpồng bơh 7 jơ 30 phuk pah drim, tŭ do geh 53 nă kơnòm bơsram bơh 36 nhai tus 16 sơnam gơtìp ală bơta bè tự kỷ. Geh 12 nă cau pơgru tus bal bơto bơtê tàm 4 ơdŭ bơsram bal mờ bơta dong kờl bơh ală cau bơsram dờng pơlam lơh broă mờ lơh broă dong kờl is cau lơgar ndai dê.

Mò Đỗ Thúy Nga là cau ƀák sỹ sơn rờp rê lơh broă tàm hìu sơnơm kơnhoàl Thạch Thất lơh Kwang atbồ Khoa kơnòm dềt hơ̆ sồng ntrờn rê lơh broă hờ Ủy ƀan sền gàr cau mè mờ kơnòm dềt, Phòng Giáo zụk mờ Đào tạo quận Ba Đình. Nam 1998, tŭ jơh sơnam rê rlô lơh broă, mò mờ hìu bơnhă neh geh dùl bơta lơh nền, tơrgùm jơh priă jền, bơta pràn nàng pờ Anih tờm Hy Vọng: “Tơngai lơh broă tàm hìu sơnơm den geh uă ngan kơnòm dềt gơbàn kòp as sồt kơndoh tơngoh Nhờk lời wơl uă bơta ờ niam bè tơngo là ală kơnòm dềt ờ ngac ngar bè ală kơnòm dềt ndai. He gŏ gơ lơh bè ờ hềt lơh jơh kơnòl bơh cau lơh sơnơm dê, bè hơ̆ den tàng añ geh dùl bơta kơp kờñ là tŭ lơi jơh sơnam rê lơh broă den rơp pờ ơdŭ lời is ai ală oh dềt krơi is do in, bè hơ̆ den kòn ùr añ dê pà añ in jồm bă ù do nàng lơh mờ priă tac hìu đah Thành Công nàng lơh gơs anih tờm do”.

Nam 2002, Anih tờm Hy Vọng geh lơh, mò Đỗ Thúy Nga pơnđàng tơl jơnau tơnggit tàm ƀău nàng rơ wah kơnòm bơsram mờ pơgru, hơ̆ sồng broă lơh bơh Anih tờm dê ngai sơlơ geh rề ơnàng. Ờ mìng bơto bơsram, anih tờm kung là anih gròi sền sàu sa, bic lơhă pah ngai ai ală kơnòm bơsram in.

Mờ 53 nă kơnòm bơsram ờ niam bồ tơngoh gam bơsram gùt ngai, mờ priă bơsram bơh 2 tơlak 500 rbô đông tus 5 tơlak đông dùl nă oh. Ƀák sỹ Đỗ Thúy Nga yal: mờ priă bơsram bè do, anih tờm pal kơlôi sơnơng, tă dơ̆ ngui dipal mờ dờp tai ală bơta dong kờl nàng gàr broă lơh: “Bơta kơlôi rơcang ngan rlau jơh añ dê là kờñ tơnguh priă nhai cau pơgru, cau lơh broă in, mơya dilah tơnguh priă nhai den pal ai priă bơsram uă rlau. Mờ ai priă bơsram uă den uă ngan hìu bơnhă kal ke, mìng gam broă là yal loh làng priă jền, he ờ at priă, he jàu jơh ai kwang bàng, cau pơgru in kơlôi rơcang jơh ală broă hơ̆, tus lồi nhai kung geh tơrgùm kờp jơh, pơn yơu tă dơ̆ ngui dipal den nhai lơi gam jơngkah den geh sền sơ wì oh lơi mờ mè bèp gơtìp kal ke den geh tơrmù priă bơsram khi in”.

Tơnơ̆ 22 nam crơng gơs tus tŭ do, anih tờm Hy Vọng neh bơto bơtê mờ lơh niam mờr 400 nă kơnòm bơsram ờ niam bồ tơngoh, gơbàn ală kòp tự kỷ krơi is. Neh geh uă oh tam gơl niam, kis gơ rờm bal mờ mpồl bơtiàn. Mờ ală tă pơgồp ai mpồl bơtiàn in, ƀák sỹ Đỗ Thúy Nga neh geh dờp khà jờng “Cau ùr càr lơgar pơn rơ gơguh jak nam 2022”. Bơta jơh nùs mờ broă lơh bơh mò Nga dê neh dờp geh bơta ki ngàm, bơta sền ngềr bơh gơp bơyô, cau lơh broă bal. Mò Lê Thị Thu, 72 sơnam, cau pơgru neh lơh broă 20 nam tàm Anih tờm Hy Vọng pà git: “Tŭ tìp mơi Nga tàm dùl anih lơh broă pa den añ gŏ lài ngan là nùs nhơm mơi dê, mơi là dùl nă cau geh nùs nhơm lơbơn niam. Pơn yơu kơnòm dềt gơtìp ntas, hòr muh den mơi geh kham mơ kơnòm dềt in mờ ai sơnơm nàng hùc. Mờ nùs nhơm he dê,mơi sùm lơh broă lơi gơtùi kơnòm dềt in là mơi lơh jơh”.

Mờ jơh ală jơnau git wă bè lơh sơnơm mờ bơto bơsram mò Đỗ Thúy Nga tơrgùm jơh ai Anih tờm Hy Vọng in. Tiah mờ mò neh sòl pơnđàng bơta àng bơh bơta chờ hờp, gơboh gơbài, kơp kơnờm dê gơ wèt mờ ală hìu bơnhă mờ ală kơnòm dềt ờ niam bồ tơngih di mờ mat sơnđan “Anih tờm Hy Vọng”.