VOV4.K’ho- Bulah jơh gùt lơgar neh cĭt geh rlau 255 tơlak ding sơnơm vaccine rcang sơndră kòp Kovid-19 ai làng bol in, mơya khà cĭt ding dơ̆ 3, ding dơ̆ 4 tàm cau bơh 18 sơnam rlau hơđang, ngan là khà cĭt ding dơ̆ 2 sơnơm vaccine sền bal là ai kơnòm dềt bơh 5 sơnam tus hơđơm 12 sơnam lơh geh dùl ết ngan, khà sơnơm vaccine ală tiah cih mat dan bơh tŭ do tus lồi nam dùl ết rlau uă ngan pơndrờm mờ khà kờñ pal cĭt. Bơta do gam lơh gơlik ală broă kờñ pal tă bơsong nàng lơh mhar tơngai cĭt tơl vaccine tàm tơngai tus. Do kung là tơngume dơ̆ pơrjum pờ tơlik tơn tàm internet rcang sơndră kòp bơh Ƀộ Y tế dê mờ 63 càr, ƀòn dờng geh bơyai lơh tàm drim ngai 25/08.

Nàng lơh mhar tơngai cĭt vaccine, Phó Giáo sư-Tiến sĩ mò Nguyễn Thị Liên Hương, Thứ trưởng Ƀộ Y tế pà gĭt, Ƀộ gam sồr Sở Y tế ală tiah pơgồp bal mờ Sở Giáo zục mờ Đào tạo lơh mhar tơngai lam cĭt vaccine ding sơn rờp ai kơnòm dềt bơh 5 sơnam tus hơđơm 12 sơnam in tàm nhai 8 mờ nhai 9 nam 2022 mờ cĭt ding tơngkah wơl ai cau bơh 12 sơnam tus hơđơm 18 sơnam in cĭt sir tàm qúy 3 nam 2022 tơn tŭ kơnòm dềt lòt bơsram hờ hìu bơsram. Lam cĭt ding tơngkah wơl ai cau bơh 18 sơnam rlau hơđang in, tơnguh bơta cĭt tơl vaccine ai ding dơ̆ 3 geh rlau 90%.

Cau mblàng K’Hạnh