Tàm 3 nhai bồ nam 2023, bơta kòp tàm bơtờp sơlơ kal ke tŭ gam geh tai 29 nă cau bơtờp kòp Kovid-19, bơta kòp sốt xuất huyết kung gam geh tềl tơngŏ gơguh tàm bàr pe tiah.

Tàm dơ̆ pơrjum, ală kwang bàng đơs là, tŭ do, ală bơta gơlik geh kal ke bè kòp tàm bơtờp tàm uă tiah tàm dunia rơ̆p gơrềng uă ngan tus broă lơh rcang sơndră kòp tàm lơgar Việt Nam đơs bal mờ càr Dăk Lăk đơs is. Nàng rcang lài rcang sơndră kòp bơtờp tàm nam 2023, càr Dăk Lăk ai jơnau kờñ tơrmù bơh 5 tus 10% khà cau bơtờp kòp mờ gơbàn chơ̆t tài bơh ală kòp tàm bơtờp pơn ndrờm mờ kờp bal tơngai bơh nam 2016-2022. Kơryan kòp di tŭ, bañ lời kòp bơtờp uă.