VOV4.K’ho- Jăt jơnau yal ngai 04/08 bơh Anih tờm Gròi sền kòp tê jê să càr Dăk Lăk dê, tàm càr pa gŏ tai dùl nă cau chơ̆t tài bơh bơtờp kòp sốt xuất huyết. Do là cau kòp dơ̆ 2 chơt tài bơh kòp sốt xuất huyết tàm Dăk Lăk bơh bồ nam tus tŭ do. Cau kòp mat sơnđan là V.V, deh nam 1968 ơm tàm thôn 2, thị trấn Buôn Trấp, kơnhoàl Krông Ana, càr Dăk Lăk.

                                          Sơklŭp jơh ală phan kờn dà nàng gơsơ̆t kih dà

Jăt cau hìu bơnhă cau kòp do dê yal, ngai 20/07 pa do, bi V.V, geh bơta gơ tơngŏ duh să uă ngan sùm, jê glar jơh làm să jan, neh hùc sơnơm ờ gĭt loh sơnơm lơi tàm anih kham sơm kòp is làng bol dê mơya kòp ờ gŏ bời dùl êt lơi. Tus ngai 23/07, cau kòp V.V lòt kham mờ mŭt piam kòp tàm Hìu sơnơm Thiện Hạnh.

Tàm Hìu sơnơm Thiện Hạnh, tơnơ̆ hơ̆ geh jun tus Hìu sơnơm dờng Tiah Tây Nguyên mờ bơta kham kòp gơ ai cồng nha bơtờp mờ sốt xuất huyết Dengue ngai dơ̆ 7 khà kơn jơ̆. Tus 8 jiơ 45 phuk mang ngai hơ̆ tơn, cau kòp geh jun tus Hìu sơnơm Chợ Rẫy, ƀòn dờng Hồ Chí Minh. Tus ngai 30/07, cau hìu bơnhă cau kòp dê dan jun rê hờ hìu, tàm gùng rê, cau kòp neh chơ̆t. Kờp tus ngai 03/08, tàm ù tiah càr Dăk Lăk gŏ 2 rbô 646 nă cau bơtờp kòp sốt xuất huyết tàm 15 kơnhoàl, thị xã mờ ƀòn dờng.

Cau mblàng Lơ Mu K’Yến