VOV4.K’ho- Jat jơnau yal bơh Anih tờm gròi sền kòp tê jê să càr Dăk Lăk dê, ngai 09/8, tàm càr git gŏ cau dơ̆ 3 chơt tài bơh kòp sốt xuất huyết, kờp bơh bồ nam tus tŭ do. Cau kòp deh nam 1971, ơm tàm sơnah ƀòn Ea Tam, ƀòn dờng Buôn Ma Thuột. Jat cau tờm hìu bơnhă cau kòp dê yal, ngai 27/7, cau kòp geh tềl tơnggŏ duh să, jê bồ, jê reh jê ram tàm să, lòt è dà neh hùc sơnơm mơya ờ git loh bơta sơnơm lơi mơya cau kòp ờ bời. Tus ngai 01/8, cau kòp geh cau tờm jun mut tàm hìu sơnơm dờng Thiện Hạnh hơ̆ sồng geh ntrờn mut Hìu sơnơm dờng tiah Tây Nguyên mờ cồng nha kham gơbàn kòp sốt xuất huyết Dengue ngai dơ̆ 5 geh tềl tơnggŏ đơs lài, as sồt klờm soh siêu vi B jŏ. Tus ngai 03/8, tài kòp jroă, cau kòp geh jun tus Hìu sơnơm Chợ Rẫy. Cau kòp chơt tàm ngai 07/8.

Sùm gơ sơt kih dà nàng rơcang sơndră kòp sốt xuất huyết

Bơdìh mờ 3 nă cau chơt, kờp tus ngai 09/8, càr Dăk Lăk neh git gŏ 2 rbô 970 nă cau gơbàn kòp sốt xuất huyết, gơguh uă rlau 5 dơ̆ pơndrờm mờ bal dùl tŭ nam lài.

Cau mblàng K’Duẩn