Cau do là ồng N.V.P, den nam 1963, ơm tàm tổ zân phố 2, thị trấn Quảng Phú, kơnhoàl Cư Mgar, càr Dăk Lăk. Jat jơnau yal bơh ồng P dê, ngai 19/10 pa do ồng đì rơndeh par bơh Việt Nam tus lơgar Nam Phi nàng nhơl chờ. Tàm tơngai nhơl chờ, ồng neh lòt nhơl uă tiah mờ ơm rềp, boh bơr, kup tê mờ uă cau. Ngai 26/10, ồng P đì rơndeh par rê wơl Việt Nam (tàm ƀlàng rơndeh par Nội Bài) geh mù tàm ƀlàng rơndeh par Singapore, tơnơ̆ hơ̆ đì rơndeh par rê càr Dăk Lăk. Tus ngai 01/11, ồng geh tềl tơnggŏ jê reh jê ram tềng kồ ntìng mờ geh uă toh pơrhê tàm ndul mờ ngkời, ồng neh lòt yal gah lơh sơnơm in. Bơh ngai 26/10 tus tŭ do, ồng P geh ơm rềp mờ tơl nă cau tàm hìu bơnhă mờ cau gùt dar. Ală cau ơm rềp mờ ồng P tŭ do ờ hềt geh tềl tơnggŏ lơi krơi, mờ kung gam ơm yah ngài is tàm hìu. Gah lơh sơnơm càr Dăk Lăk neh ai mẫu kòp bơh tềl sồt tềng toh pơr hê tàm kơltau mờ dà tàm rơnồng dờ bơh ồng P dê pơyua Viện Vệ siñ zịc tễ Tây Nguyên in lơh xét nghiệm.

Gah lơh sơnơm Dăk Lăk neh lơh anih sơm kòp rang dồ tàm hìu sơnơm dờng tiah Tây Nguyên

Sở Y tế Dăk Lăk kung geh sră nggal jal mhar sồr lam lơh ală broă lơh rơcang sơndră kòp rang dồ; gàr sùm ală mpồl lơh broă sơrbac mhar tàm ală mpồl mờ ală hìu sơnơm, hìu sơnơm kơnhoàl, thị xã, ƀòn dờng; Lam lơh rơndap broă rơcang sơndră kòp rang dồ tàm càr, sơlơ tơnguh broă lơh mblàng yal jơnau rơcang sơndră kòp rang dồ mờ pơgồp bal mờ ală anih lơh broă, mpồl bal geh gơ rềng geh gùng dà bơsong di tŭ ờ lời kòp bơtờp uă tàm mpồl bơtiàn.