VOV4.K’ho- Mho ngai 07/6, Ủy ƀan Ñân zân càr Dăk Lăk bơyai lơh pơrjum pờ tơlik tơn tàm internet mờ ală kơnhoàl, thị xã, ƀòn dờng tàm càr nàng kờñ sền wơl tơngai lam lơh cit sơnơm vaccine kòp Kovid-19 tàm càr.

Kờp tus tŭ do, càr Dăk Lăk neh dờp rlau 3 tơlak ding sơnơm vaccine kòp Kovid-19 ală bơta. Càr neh lam lơh cit sơnơm vaccine ai cau bơh 5 sơnam rlau hơđang in, tàm hơ̆, cau bơh 12 sơnam rlau hơđang cit tơl 2 ding geh mờr 96% mờ 26% ding dơ̆ 1 ai mpồl cau bơh 5 tus 11 sơnam in. Dăk Lăk neh cit ding dơ̆ 3, dơ̆ 4 ai ală cau bơh 18 sơnam rlau hơđang in mơya cồng nha cit ờ huan uă, ding dơ̆ 3 mìng geh 33%, tàm hơ̆ geh 5 kơnhoàl geh hơ đơm 30%, ding dơ̆ 4 mìng geh 0,5%. Mờ tơngai lam lơh cit sơnơm vaccine lơyài bè tŭ do, Dăk Lăk gam jơngkah 73 rbô 105 ding sơnơm vaccine. Gơs là tiah tàm mpồl càr geh khà cit sơnơm vaccine kòp Kovid-19 ờ uă ngan tàm gùt lơgar. Nàng tơnguh mhar tơngai cit sơnơm vaccine kòp Kovid-19 càr Dăk Lăk sồr ală tiah pơn jat tai lam lơh ală broă cit sơnơm vaccine rơcang sơndră kòp Kovid-19 lơh geh ală broă geh jàu; mờ kung sồr ală anih lơh broă, mpồl cau pal lơh lài, lam lài tàm broă cit sơnơm vaccine.

Cau mblàng K’ Duẩn