Broă lơh bơh Anih tờm Dong kờl bơceh lơh Bơtàu tơnguh mpồl bơtiàn gơwèt Ƀộ Khoa họk mờ Kông nghệ pơgồp bal mờ Hìu sơnơm Klờm soh càr Dăk Lăk dê bơyai lơh bơh ngai 09 tus jơh ngai 15 nhai 11.

Tŭ do, khà bơtờp kòp jòr bơsiă mhàm tàm jơh gùt càr Dăk Lăk kung gam ơm tàm khà rlau 170 nă cau tàm 100 rbô nă làng bol; gam uă cau kòp jòr bơsiă mhàm bơtờp kòp tàm ƀòn lơgar ờ hềt geh gŏ, sơm kòp di tŭ. Gah lơh sơnơm càr Dăk Lăk neh sơlơ lơh jăt broă kham săc rwah mờ sơm kòp tàm ƀòn lơgar. Tàm dơ̆ do, Anih tờm Dong kờl bơceh lơh Bơtàu tơnguh mpồl bơtiàn dong kờl kham săc rwah tàm 6 xã bơh kơnhoàl Ea H’leo dê, mờ jŏ jòng tàm 6 ngai, khà pơgăp 2 rbô 700 nă cau, jơh ală ndrờm cùp rùp X-kwang; tŭ gŏ geh kòp geh ai kơnhă xét nghiệm mờ dilah geh cồng nha bơtờp bè kòp jòr bơsiă mhàm geh sơm kòp tơn.