Tàm ală nam do, srơh pà mhàm is bơh càr Kon Tum dê neh tă pơgồp uă ngan ai broă lơh sền gròi, sền gàr mờ tơnguh uă pràn kơl dang să jan ai làng bol in. Mìng is nam 2022 pa do jơh gùt càr bơyai lơh geh 34 dơ̆ pà mhàm is, dờp rlau 6 rơbô 800 kơldung mhàm, lơh geh rlau 136% broă jàu bơh Mpồl sồr lơh dà lơgar hòi jà pà mhàm is dê jàu. Srơh pà mhàm is neh lơh uă tiah tàm jơh ală kơnhoàl, ƀòn dờng mờ anih lơh broă, mpồl lơh broă bơh càr Kon Tum dê gơ gơs dùl bơhiàn niam bơnĕ niam chài.

Mpồl đơng lam hòi jà pà mhàm is càr Kon Tum ai jơnau kờñ tàm nam 2023 hòi jà geh 1 rơbô 500 nă cau tus bal cih mat pà mhàm is mờ lam lơh dờp 7 rơbô 200 kơl dung mhàm di mờ jơnau kờñ ngui mhàm bơh Hìu sơnơm dờng càr dê nàng sơm kòp ai cau kòp in.

Kung tàm drim òr (07/04), tàm ƀòn dờng Buôn Ma Thuột, Mpồl đơng lam lam sồr ai mhàm dong kờl is càr Dăk Lăk bơyai lơh broă “Ngai gùt làng bol tus bal ai mhàm dong kờl is”, nam 2023 mờ tơngu me “Pà ntờc mhàm pơrhê-jào bơta kis”. Broă lơh neh hòi jà rơlao 600 nă cau là kwang bàng, kông cứk, viên cứk, mpồl ling tus bal ai mhàm dong kờl is. Bơh tŭ hơ̆ geh 459 kơl dung mhàm.

Mò Ayun H’ Hương, Chủ tịc Mpồl Cữ thập đỏ càr Dăk Lăk pà git, ală nam pa do, khà anih lơh broă, mpồl lơh broă, hìu măi, kông ty, hìu bơsram bơyai lơh ală broă lơh ai mhàm dong kờl is ngai sơlơ geh uă bơh broă lơh bè Lơh chờ nam pa pơrhê, ngai rơlô pơrhê, broă lơh pơrhê... ală ngai lơh chờ ai mhàm dong kờl is neh lơh geh bơta niam ai uă cau geh tus bal pơgồp bal mờ broă lơh geh bơta niam nàng kis ai ală cau kòp gam kờñ mhàm in. broă tơnkah 23 nam ngai gùt làng bol ai mhàm dong kờl is là dơ̆ nàng yal mblàng tơnguh uă rơlao tai jơnau kờñ, bơta kwơ niam ai mhàm dong kờl is dong klàs kòn bơnus, lơh geh uă tàm gùt tiah broă ai mhàm dong kờl is tus tàm mpồl bơtiàn.