VOV4.K’ho - Jăt khà kờp bơh Anih tờm gròi sền kòp tê jê să càr Dăk Lăk yal, bơh bồ nhai 10 tus tŭ do, kòp sốt xuất huyết (SXH) tàm càr geh tơngŏ ală kal ke, khà cau gơtìp kòp pa gơguh uă mờ sùm geh gŏ cau gơtìp chơ̆t tài kòp SXH.

Kwang bàng lơh sơnơm càr Dăk Lăk ƀồm sơnơm lơh kloh vi khuẩn tàm tiah kis nàng kơrian broă bơtờp bơh kòp sốt xuất huyết

Mìng tàm 10 ngai sơnrờp bơh nhai 10 do neh geh mờr 500 nă cau gơtìp kòp SXH, tơnguh khà cau gơtìp kòp tàm nam 2022 tàm càr Dăk Lăk tus rơlao 7 rơbô nă. Pal kah ngan, bơh bồ nhai 10 tus tŭ do, càr neh gŏ geh 2 nă cau gơtìp chơ̆t tài kòp SXH. Jăt ồng Hoàng Hải Phúc, Phó kwang atbồ drơng broă lơh tàm Anih gròi sền kòp tê jê să càr Dăk Lăk yal, mờ broă mìu jŏ ngai tàm ală ngai pa do tàm càr, kòp SXH geh tơngŏ gơguh tàm tơngai tus. Nàng kơrian broă gơguh bơh kòp SXH, gah lơh sơnơm càr Dăk Lăk neh tơnguh broă lam sồr, tơnguh jơnau git wă làng bol in tàm broă rơcang sơndră mờ kòp; Lơh jăt ală broă lơh kloh niam tiah kis, gơsơ̆t kih dà tus tơl ƀòn, hìu nhă.

VOV Tây Nguyên – Cau mblàng Ndong Brawl