8 tiah kòp geh tàm ală kơnhoàl: Lăk, Ea Kar, M’Drak mờ ƀòn dờng Buôn Ma Thuột, tàm hơ̆ kơnhoàl Lăk mờ Ea Kar là 2 tiah geh khà cau kòp uă ngan rlau jơh mờ dơ̆ dùl dơ̆ là 39 nă mờ 38 nă cau kòp. Ală cau bơtờp kòp uă ngan là kơnòm bơsram mờ ờ hềt cĭt vaccine rcang sơn dră kòp thủy đậu.

Jat ƀák sĩ mò Trần Thị Thúy Minh, Kwang atbồ khoa Kơnòm dềt tơrgùm bal, Hìu sơnơm dờng tiah Tây Nguyên yal, virus lơh bơtờp kòp thủy đậu ơm tàm mpồl virus bơtờp kòp pràn, dilah ờ cĭt vaccine rcang sơndră kòp mờ ơm rềp mờ cau bơtờp kòp den bơta pràn bơtờp kòp là uă ngan. Nàng tơrmù ƀà bơta pơhìn gơbàn kòp mờ bơtờp kòp thủy đậu, broă lơh kwơ màng ngan là cĭt vaccine rcang sơndră kòp. Dilah kơnòm dềt gơbàn kòp pal geh jun tus hìu sơnơm nàng ală ƀák sĩ in tam cah kòp mờ sơm kòp di tŭ.