VOV4.K’ho - Tơnơ̆ mờ dùl tơngai kòp Kovid-19 gơ-ơm ing, ală ngai pa do, tàm càr Dăk Lăk neh gŏ khà cau gơtờp kòp Kovid-19 gơguh uă. Mìng is tàm 20 ngai pa do, càr do neh gŏ geh mờr 600 nă cau. Khà cau gơtờp kòp gơguh mhar tàm tŭ khà cau cit sơnơm vaccine sơndră mờ kòp Kovid-19 ờ hềt geh pơn drờm mờ broă jào Ƀộ Y tế dê neh sồr, neh lơh broă rơcang sơndră mờ kòp Kovid-19 tàm càr Dăk Lăk gơtìp uă kal ke. Geh lơh sơnơm càr Dăk Lăk pal bơsong bơta do bè lơi? Cau ai tơngit jơnau đơs Việt Nam neh geh dơ̆ lùp ồng Nay Phi La, Kwang atbồ Sở Y tế càr Dăk Lăk bè tơngu me do!

                           Càr Dăk Lăk tơnguh broă cit sơnơm vaccine sơndră mờ kòp Kovid-19

Ơ ồng, dan ồng pà git bè bơta gơtìp kòp Kovid-19 tàm càr Dăk lăk tàm tơngai pa do?

Ồng Nay Phi La: “Tàm càr Dăk Lăk tus ngai 12 nhai 09 kờp jơh khà cau gơtìp kòp Kovid neh gơguh uă, tŭ do neh geh 578 nă. Khà cau kòp gơguh pa do geh uă bơta, lài ngan là bŭ lah neh lơh jăt broă cit sơnơm vaccine ding dơ̆ 4 mờ ding bơtơl wơl, bơdìh hơ̆ tai geh dùl khà ală kơnòm dềt tàm tơngai gơtìp kòp Kovid-19 den ờ hềt geh cit sơnơm vaccine ding lơi. Tàm hơ̆ uă ngan gơwèt mờ cau dờng sơnam tơnơ̆ mờ tŭ neh cit ding dơ̆ 3 kơlôi là neh geh bơta pràn sơndră mờ kòp mờ tŭ ờ geh cit ding dơ̆ 4 den khà cau gơtìp kòp Kovid-19 tàm cau dờng neh gơguh uă ngan. Do kung là broă pal rơcang ngan tài jơnau git wă bơh làng bol dê tàm broă cit sơnơm vaccine tàm tŭ do”.

Ơi, gơtùi gŏ là, tàm broă cit sơnơm vaccine sơndră mờ kòp Kovid-19 den sơnơm vaccine là bơta kwơ màng ngan, mơya jăt khà kờp bơh Sở Y tế den khà làng bol bơh 18 sơnam rơlao hờ đang cit sơnơm vaccine sơndră mờ kòp Kovid-19 ding dơ̆ 3 geh 86% mờ ding dơ̆ 4 geh rơlao 66%. Kơnòm dềt bơh 12 tus 17 sơnam, ding dơ̆ 3 geh 68% mờ kơnòm dềt bơh 5 tus hờ đơm 12 sơnam ding sơnrờp geh mờr 90% mờ ding dơ̆ 2 geh 45%. Khà do gam ờ uă ngan jăt mờ jơnau sồr bơh Ƀộ Y tế ai, bè hơ̆, broă lơh nàng tơnguh khà cit sơnơm vaccine sơndră mờ kòp Kovid-19 tàm tơngai tus geh là broă lơi ơ ồng?

Ồng Nay Phi La: “Tềng đăp mờ bơta do den Ƀộ Y tế neh lam sồr broă lơh “Tài dùl lơgar Việt Nam kơ̆ kơl jăp mờ pràn kơl dang tàm mpồl bơtiàn kung bè jơh ală gah lơh broă, den gah lơh sơnơm neh bơ̆t bơtàu dùl rơndăp broă rơcang lài geh pơgồp bal mờ Sở Giáo dục càr Dăk Lăk kung bè jơh ală kơnhoàl, thị xã kung bè broă tus bal bơh jơh ală mpồl lơh broă cíñ trị. Jăt rơndăp broă geh ai tàm ngai 24 nhai 09 tus, UɃÑZ càr geh bơyai lơh dơ̆ lam sồr sơndră mờ kòp Kovid-19 tàm bơta pa mờ tơngu me “Tài dùl lơgar Việt Nam kơ̆ kơl jăp, pràn kơl dang” mờ cit sơnơm vaccine sơndră mờ kòp ai kơnòm dềt in. Bal mờ hơ̆, gah lơh sơnơm geh lơh jăt broă cit sơnơm ai jơh ală hìu bơsram in tŭ ală kơnòm dềt tus lòt bơsram nàng gàr niam ală kơnòm dềt geh tơl ală ding sơnơm vaccine mờ geh khà uă “Tài dùl lơgar Việt Nam kơ̆ kơl jăp mờ pràn kơl dang”.

Ơ ồng, tềng đăp mờ bơta kòp Kovid-19 gơtìp kal ke, tŭ gùt lơgar gam geh gŏ cau gơtờp kòp bal mờ tơngŏ uă bơh jơi virus SARS-KoV-2, pa do Ƀộ Y tế neh ai lơh jăt sồr rơcang sơndră mờ kòp Kovid-19 tàm bơta pa hơ̆ là jơnau 2K, bè hơ̆, jơnau sồr do geh bơta lơi pa pơn drờm mờ jơnau sồr lài do ơ ồng?

Ồng Nay Phi La: “Jơnau 2K tàm do hơ̆ là lơh kloh vi khuẩn mờ pơn chèo den pal geh gơwèt mờ ală cau geh pin tŭ he tus tàm ală tiah gal cau bè drà ha là tiah ndơ̆p den ndrờm pal pơn chèo mờ lơh kloh vi khuẩn. Bal mờ hơ̆, bơdìh hơ̆ tai pal tơnguh broă cit sơnơm vaccine, sơnơm vaccine den bol añ neh lơh jăt mờ kung bè sơnơm bal mờ broă sơm kòp den broă do jơh ală hìu sơnơm, ală hìu sơnơm dềt neh rơcang tơl ală sơnơm tŭ geh cau kòp Kovid-19 mờ dùl tàm ală bơta kwơ màng ngan là jơnau git wă bơh làng bol dê, bŭ lah he neh sơrlèt mờ tơngai gơtờp uă, mơya kung gam pà gàr niam broă cit sơnơm vaccine kung bè lơh jăt ală jơnau sồr bơh Ƀộ Y tế dê den he hơ̆ sồng kơrian geh jơh kòp Kovid-19”.

Ơi, dan ưn ngài ồng!

Cau mblàng Ndong Brawl