Gơ wèt mờ làng bol kòn cau Rơđê tàm ƀòn Kom Leo- tiah pa git gŏ uă cau gơbàn kòp mprơm duh să ngan rlau jơh tàm xã Hòa Thắng, ƀòn dờng Buôn Ma Thuột ală nam lài, den kòp mprơm duh să tŭ do neh ờ gam tai. Bi Hrobeca Mlô, ơm tàm ƀòn Kom Leo pà git: “Tàm ƀòn drn ndrờm bè làng bol lòt lơh mìr uă ngan, geh uă cau den lòt tàm brê pơ̆ ƀang. Tŭ do jơnau git wă sền gàr is să jan neh geh tơnguh, khi git uă rlau. Kung kơnờm hìu sơnơm xã tus mblàng yal uă, tŭ do dilah gơtìp duh să den lòt tus hìu sơnơm, ờ di bè rài yau khi hòi cau bơ jơu rac yàng, dilah lòt tàm brê den kung cèng kơmùng bic sơl”.

Ƀák sĩ Hoàng Văn Hùng, kwang atbồ Hìu sơnơm xã Hòa Thắng pà git, bơta chài git wă mờ jơnau git wă rơcang sơndră kòp bơh làng bol dê ngai sơlơ tơnguh; rài kis geh tam gơl niam den tàng bơta lòt tàm brê, lòt tàm mìr uă ngai neh ờ huan geh tai. Bal mờ hơ̆, broă lam lơh ală broă lơh rơcang sơndră kòp mprơm duh să kung sùm geh Hìu sơnơm xã sền gròi lam lơh: “Hìu sơnơm xã lam lơh pơrjum pah nhai ai mpồl cau lơh broă bal in nàng sơlơ mblàng yal rơcang sơndră kòp mprơm duh să ai ală cau geh jơnau pơhìn uă in bè lòt tàm brê, bic tàm mìr hơ̆ sồng ală cau geh cau tờm lòt lơh broă ngài tàm ală tiah gam geh kòp mprơm duh să, mờ kung pà kơmùng geh tram dà sơnơm”.

Jat ƀák sĩ Võ Minh Hùng, Kwang atbồ Hìu sơnơm ƀòn dờng Buôn Ma Thuột pà git, nam 2022, jơh 21 xã, sơnah ƀòn bơh ƀòn dờng dê neh 3 nam sùm ờ geh kí siñ trùng kòp mprơm duh să tàm ƀòn dờng, ală bơta pal jat nàng tơn jơh kòp mprơm duh să geh lam lơh sùm. Ƀòn dờng là tiah sơn rờp bơh càr Dăk Lăk dê geh dờp là neh tơn jơh kòp mprơm duh să. Ƀák sĩ Võ Minh Hùng đơs là, bulah bè hơ̆, ƀòn dờng kung gam pơn jat tai lam lơh ală broă lơh rơcang sơndră kòp mprơm duh să gơbàn wơl: “Bơta ờ gơtùi tơn jơh kòp mprơm duh să tàm nam 2022 là ală cồng nha bơh sơn rờp lơm gơ dê, tàm tơngai tus kung gam pal sơlơ tơnguh rlau tai broă lơh mblàng yal tus làng bol, ngan là cau lòt tàm brê, bic tàm mìr, halà lòt lơh broă tàm tiah ndai rê nàng khi in git sền gàr pràn kơldang să jan ai mpồl bơtiàn in, bơdìh hơ̆ tai, bol hi kung geh sơlơ lam lơh ală ơdŭ bơto pơlam nàng tơnguh jơnau git wă ai kwang bàng lơh sơnơm in bè broă lơh git wă, broă lơh mblàng yal mờ broă lơh pơlam mblàng yal jơnau ai làng bol in bè ală broă lơh rơcang sơndră kòp mrpơm duh să tàm ƀòn dờng”.

Jat Anih tờm Gròi sền kòp tê jê să càr Dăk Lăk yal, bơta kòp mprơm duh să neh gơmù rơhời tàm 3 nam do. Dilah bè nam 2020, gùt càr git gŏ 126 nă cau kòp mprơm duh să den tus nam 2021- 2022, pah nam mìng git gŏ 10 nă cau. Bơdìh mờ ƀòn dờng Buôn Ma Thuột neh geh dờp tơn jơh gơtùi kòp mprơm duh să, tŭ do geh 6 kơnhoàl, thị xã cih mat geh tơn jơh kòp mprơm duh să tàm nam do.

Ƀák sĩ Hoàng Hải Phúc, Phó Kwang atbồ drơng broă Anih tờm gròi sền kòp tê jê să càr Dăk Lăk pà git, bulah broă rơcang sơndră kòp mprơm duh să tàm càr geh cồng nha niam, mơya tàm tiah Tây Nguyên mờ 2, 3 càr bơh lơgar he dê kòp kung gam gơlik geh kal ke, jơnau pơhìn gơbàn kòp mprơm duh să mờ gơbàn uă gơs kòp dờng kung sơl. Bè hơ̆ den tàng tơngai tus, Anih tờm rơcang lài bơt bơtàu broă rơndap lơh rơcang sơndră kòp mprơm duh să gơbàn wơl, gàr sùm ală broă lơh jat sền sùm tàm jơh ală kâp: “Bol hi sơlơ tơnguh broă lơh mblàng yal ai làng bol mờ ală ƀan, gah broă lơh in tàm pơgồp bal. Dơ̆ 2 tai là bol hi sơlơ tơnguh broă jat sền cau kòp, dơ̆ 3 là gròi sền cau kòp, rơcang lài tàm ală tiah geh uă kòp. Jat tơngai pơrgon tus lùp sền ală cau lòt tàm brê, bic tàm mìr, ală cau pin geh kòp den ai mhàm lơh xét nghiệm lài nàng git gŏ ală cau kòp digơlan geh mờ bol hi kung lam lơh broă lơh pà kơmùng tram dà sơnơm 2 dơ̆”.

Ală cồng nha niam tàm broă lơh rơcang sơndră kòp mprơm duh să tàm càr Dăk Lăk là bơta pơn jờng nàng càr pơn jat tai kơryan kòp do, wèt tus tơn jơh kòp mprơm duh să tàm nam 2028.