VOV4.K’ho- Ngai 14/10, mpồl lơh broă bơh Ƀộ Y tế bơh ồng Bùi Khánh Toàn, Viện phó Viện Vệ siñ Dịc tễ Tây Nguyên lơh kwang atbồ mpồl neh geh dơ̆ lơh broă mờ Hìu sơnơm dờng tiah Tây Nguyên mờ Anih tờm Gròi sền kòp tê jê să càr Dăk Lăk bè broă rcang sơndră kòp rang dồ tàm càr. Jat jơnau yal tàm dơ̆ lơh broă, tơnơ̆ tŭ geh jơnau yal bè kòp rang dồ bơh Mpồl lơh sơnơm Dunia dê, Sở Y tế càr Dăk Lăk neh rcang broă lơh sơndră wơl mờ lam lơh jat sền tàm ală tiah gùng dềt, gùng pờ, gùng tiah nhàr lơgar.

Mpồl lơh broă lòt sền tiah sơm kòp rang dồ tàm Hìu sơnơm dờng tiah Tây Nguyên

Tơnơ̆ tŭ Việt Nam geh cau kòp rang dồ sơn rờp tàm ƀòn dờng Hồ Chí Minh, gah lơh sơnơm kung neh cribơyai mờ Ủy ƀan Ñân zân càr Dăk Lăk ai lơh jat broă lơh lơh broă ing sơndră mờ kòp rang dồ; bơsram tàp ai mpồl cau lơh sơnơm in tàm jơh bal mpồl sơm kòp mờ rcang sơndră kòp. Hìu sơnơm dờng tiah Tây Nguyên kung neh rcang lài ală phan bơna, măy mok, sơnơm tơm ba mờ mpồl cau lơh broă tàm broă lam lơh kham, sac rơ wah, tàm pà gùng lòt, ai ơm yah ngài mờ tơrgùm phan kòp nàng sơm kòp dilah sền gŏ cau kòp rang dồ. Nàng tơnguh uă cồng nha broă lơh rcang sơndră rang dồ, mpồl lòt sền cribơyai bè broă lơh đơng lam sơnđờm lơh wơl ală Mpồl đơng lam rcang sơndră kòp; sơlơ tơnguh lòt sền, jat sền, đơng lam rcang sơndră kòp tàm jơh gùt càr, ngan là ală tiah geh bơta pơhìn bơtờp kòp uă.

VOV Tây Nguyên- Cau mblàng K’Hạnh