Tờm ngan là sơlơ tơnguh tài khòm tơrgùm phan kòp, sơm kòp ai cau kòp in; lơh pràn pơs wàs sàng goh tiah ơm kis, jat sền kòp bơtờp mờ gròi sền kràñ tiah bơtờp kòp. Bơh bồ nam tus tŭ do, càr Dăk Lăk cih dờp 5 tiah kòp jơng – tê- bơr mờ pơgăp 700 nă cau bơtờp tàm uă tiah; 26 nă cau bơtờp kòp rang mờ mờr 600 nă cau kòp mprơm gơlik mhàm, gơguh pràn pơndrờm dùl tŭ bal mờ nam lài.

Anih tờm Kòp tê jê să càr Dăk Lăk neh tơnggơs mpồl lòt sền, jat sền mờ bơto pơlam, mblàng yal làng bol in tơnguh uă bơta gĭt wă rcang lài kơryan kòp. Mơkung pà dà sơnơm nàng ƀồm lơh kloh khuẩn tiah ơm kis, rcang lài kơryan kòp.