VOV4.K’ho- Ngai 16/02, Hìu sơnơm Đại họk Buôn Ma Thuột tàm sơnah ƀòn Tân An, ƀòn dờng Buôn Ma Thuột, càr Dăk Lăk neh bơyai lơh ai ngui mờ sơn đờm lơh broă. Hìu sơnơm geh priă tă lơh rlau 600 tơmàn đông, sơn đờm lơh broă ai ngui 200 nơm jơ nờng kòp mờ ală cuyên khoa tờm bè: Ngoại tổng quát; Ngoại thần kiñ; Nội Tổng hợp; deh dùh; mpồl dong kờl deh dùh IVF; Tim mạch can thiệp; kham đal git rùp hin; xét nghiệm; gròi sền đal git mờ sơm kòp ung thu; anih tờm sề, kàng, muh mat- lơh niam să jan...

Hìu sơnơm geh rơcang ală broă lơh đal git rùp cùp mờ sơm kòp pa ngan. Broă bơt bơtàu hìu sơnơm Đại họk Buôn Ma Thuột geh dong tơrmù ƀà bơta kơn jơ̆ ai ală hìu sơnơm kấp hơđăng in, kuơmàng là drơng jơnau kờñ bơh làng bol tàm ƀòn dờng dê bè ală broă drơng ala geh bơta chài uă bè sơm kòp bè gùng plai nùs, ngoại khoa, kơnền.. mờ bơta niam, broă drơng ala tơl khà dunia.

Cau mblàng K’Duẩn