Dăk Nông gam lơh pràn ală broă lơh kơryan kòp sốt xuất huyết. Kòp sốt xuất huyết geh tàm jơh 71 xã, sơnah ƀòn, thị trấn tàm Dăk Nông dê. Tàm hơ̆, kơnhoàl Dăk Mil, Cư Jŭt, Dăk Song mờ ƀòn dờng Gia Nghĩa là ală tiah geh khà cau bơtờp kòp sốt xuất huyết uă ngan rlau jơh.

Ƀák sĩ Hìu sơnơm kơnhoàl Dăk Song kham kòp ai cau kòp sốt xuất huyết in

Jat ồng Huỳnh Thanh Huynh, phó Kwang atbồ Sở Y tế càr Dăk Nông yal, kòp sốt xuất huyết tàm ù tiah càr dê gam gơlik geh kal ke, geh poh geh tus 170 nă cau bơtờp kòp. Nàng kơryan bơta bơtờp uă bơh kòp sốt xuất huyết, gah lơh sơnơm gam lơh pràn broă lơh mblàng yal tơnguh uă bơta gĭt wă bơh làng bol dê; hòi jà ală mpồl cau, gơnoar atbồ hòi jà làng bol tus bal tàm broă lơh lơh sàng goh tiah ơm kis mờ gơ sơ̆t kih dà.