VOV4.K’ho - Càr Lâm Đồng gam gơtìp mờ broă di gơlan gơtờp uă kòp sốt xuất huyết tŭ kờp jơh khà cau gơtìp kòp do neh tus rơlao 2 rơbô nă. Tus tŭ do, càr Lâm Đồng neh gŏ geh rơlao 2 rơbô nă cau gơtìp kòp sốt xuất huyết, gơguh rơlao 1 rơbô 500 nă pơn drờm mờ tŭ do nam lài.

              Càr Lâm Đồng gam tơnguh ală broă lơh nàng rơcang sơndră mờ sơm kòp sốt xuất huyết

Tàm tŭ hơ̆, càr do gam mŭt tàm kàl mìu uă, den tàng broă di gơlan gơtờp uă kòp sốt xuất huyết tàm uă tiah là uă ngan. Ồng Trịnh Văn Quyết, Phó kwang atbồ Sở Y tế càr Lâm Đồng pà git, bal mờ broă chồl pràn broă lam sồr làng bol lơh jăt niam ală broă kơrian, gah lơh sơnơm càr do kung gam lơh jăt uă broă nàng rơcang sơndră mờ sơm kòp. Jơh ală hìu sơnơm tàm gùt càr ndrờm geh broă rơndăp lơh mùl màl mờ geh rơcang lài phan lơh broă, sơnơm, phan lơh sơnơm nàng tŭ lơi kung rơcang sơm kòp cau kòp in. Mờ lơh jăt ală broă nàng tŭ gơtìp ală tiah kòp pa den geh kơrian mờ gơsơ̆t kòp di tŭ.

Cau mblàng Ndong Brawl