VOV4.K’ho - Tây Nguyên gam tam gơl bơh kàl prang tus kàl mìu. Do là tŭ ƀuơn nàng sơmăc deh tăp mờ gơs dờng pràn, bơta tờm tàm broă lơh gơtờp kòp sốt xuất huyết. Jăt anih lơh broă lơh sơnơm yal, nam do kòp gơtờp do geh gơtìp pràn jăt mờ tơngai 3 nam dùl dơ̆. Den tàng, ală cau pal tơnguh jơnau git wă tàm broă rơcang sơndră mờ kòp nàng tơmù ờ uă ngan kòp gơtờp.

Tàm kơnhoàl tiah nhàr dà lơgar Ea Súp, càr Dăk Lăk, bơh bồ nam 2022 tus tŭ do neh dờp geh di pơgăp 120 nă cau gơtìp kòp sốt xuất huyết 6 tàm 10 xã, thị trấn. Pơn drờm mờ tŭ do nam lài, gơguh 115 nă. Tŭ do geh 2 tiah gơtờp kòp sốt xuất huyết geh gŏ uă ngan là thị trấn Ea Súp mờ 81 nă bal mờ xã Cư̆ Mlan 30 nă. Tàm hơ̆, hìu sơnơm kơnhoàl Ea Súp neh dờp sơm kòp ai 113 nă cau mŭt piam kòp tài bơh kòp sốt xuất huyết. ală cau kòp tŭ mŭt piam kòp ndrờm gơtìp tàm bơta kòp jroă.

Dùl nă cau kòp gam sơm kòp tàm hìu sơnơm kơnhoàl Ea Súp pà git, tŭ rơ̆p gơtìp kòp, geh tơngŏ duh să den tàng neh bơi is sơnơm cèng rê nàng hùc. Hùc sơnơm 2, 3 ngai mơya kòp ờ gơmù, duh să uă rơlao bal mờ gơdan hă, den tàng cau tàm hìu nhă cèng tus piam kòp tàm hìu sơnơm. Cau kòp do kung pà git, tơngai pa do, trồ tiah mìu, tơngai duh ni sơna, gùt dar hìu geh uă chi che, rŭ rơm den tàng sơmăc geh uă. Tàm tŭ bĭc ngai, hìu nhă ờ mờng mờ broă dang kơmùng, den tàng gơtìp sơmăc kăp, den tàng gơtìp kòp sốt xuất huyết. Tàm kàl prang, tài ờ tơl dà ngui sa, ală hìu nhă mờng prăp dà tàm ală bơta phan krơi is, den tàng sơmăc deh tăp, deh kòn mờ gơs dờng, lơh kòp sốt xuất huyết ngai sơlơ gơtờp pràn.

Jăt ƀák sĩ Kiều Thị Thanh Hà, kwang bàng lơh broă tàm hìu sơnơm kơnhoàl Ea Súp pà git, tŭ do trồ tiah tàm kơnhoàl do gam mŭt tàm kàl mìu. Do là bơta tờm ƀuơn ngan nàng sơmăc deh tăp, deh kòn mờ gơs dờng. Geh bơta cau gơtìp kòp sốt xuất huyết gơguh uă mhar là tài làng bol gam ờ sền gròi, jơnau git wă tàm broă rơcang sơndră mờ kòp gơtờp gam ờ uă. Tàm hơ̆, làng bol gam prăp dà mìu tàm ală bơta phan mờ ờ dơ̆p kơ̆. Gùt dar hìu geh uă phan ngui kờn dà ờ geh kwơ neh lơh geh bơta niam nàng sơmăc in deh tăp, deh kòn mờ gơs dờng. bơta pal đơs ngan, tŭ gơtìp kòp, làng bol ờ tus hờ hìu sơnơm mơ nàng geh kham sơm kòp mờ blơi is sơnơm cèng rê nàng hùc. Mìng tŭ kòp neh jroă ngan hơ̆ sồng tus hờ hìu sơnơm nàng sơm kòp.

Tềng đăp mờ bơta khà cau gơtìp kòp sốt xuất huyết gơguh uă, nàng di tŭ kơrian kòp gơtờp uă, Hìu sơnơm kơnhoàl Ea Súp neh lơh ngan lơh jăt ală broă rơcang sơndră mờ kòp tus tơl ƀòn. Mùl màl, Hìu sơnơm kơnhoàl Ea Súp neh pơgồp bal mờ ală hìu sơnơm xã, thị trấn geh tiah gơtìp kòp nàng lơh jăt ală broă ƀồm sơnơm gơsơ̆t sơmăc. Tàm hơ̆ uă ngan là hìu sơnơm do neh ai 12 mpồl tam dră mờ kòp gơtờp ntrờn; tàm hơ̆, hìu sơnơm kơnhoàl geh 2 mpồl mờ 10 hìu sơnơm xã, thị trấn tơl hìu sơnơm geh ai 1 mpồl lơh broă.

Tŭ do, hìu sơnơm kơnhoàl Ea Súp neh đơng lam ală hìu sơnơm xã tơnguh broă lơh kloh tiah kis, tàm hơ̆ uă ngan là gơsơ̆t kih dà, ƀồm sơnơm gơsơ̆t sơmăc tàm ală tiah geh kòp. Bơdìh mờ ală broă lơh tờm, kơrian kòp gơtờp, Hìu sơnơm kơnhoàl Ea Súp neh pơgồp bal nền nòn mờ ală gah, mpồl lơh broă nàng tơnguh broă lam sồr rơcang sơndră mờ kòp sốt xuất huyết tus mờ làng bol mờ uă broă lơh...

Kung jăt Hìu sơnơm kơnhoàl Ea Súp yal, bơta tơngŏ bơh kòp tàm kơnòm dềt mờ cau dờng ndrờm bal. Mơya, tàm cau dờng den khà ngai gơtìp duh să jŏ rơlao, bơta tơngŏ jroă rơlao mờ bơta gơtìp kung uă rơlao. Bơta tờm bơh kòp sốt xuất huyết là duh să mờ gơlik mhàm, ờ pràn tàm dơlam să, di gơlan lơh gơtìp as tơngoh. Tŭ do, kòp sốt xuất huyết ờ hềt geh sơnơm vaccine rơcang sơndră mờ kòp, ờ hềt geh sơnơm sơm bời kòp do. Di lah cau kòp ờ geh sơm kòp di tŭ, di gơlan lơh gơtìp chơ̆t uă ngan.

Tềng đăp mờ bơta mùl màl do, Hìu sơnơm kơnhoàl Ea Súp yal lài tơl nă làng bol, cau tàm hìu nhă pal tơnguh jơnau git wă, rơcang lài sền gàr bơta pràn kơl dang să tờm, bañ lời sơmăc kăp. Bơdìh hơ̆ tai, làng bol pal rơcang gơsơ̆t kih dà-do là phan tờm lơh gơtờp kòp tàm hìu ơm kis pah ngai.

Ƀák sĩ Trần Thị Thúy Minh, Kwang atbồ Khoa Nhi tơrgùm bal, Hìu sơnơm tiah Tây Nguyên pà git, nam do, Hìu sơnơm do neh rơcang lài ală gùng dà broă sơm kòp cau kòp sốt xuất huyết in. Tàm hơ̆ uă ngan là khoa geh ai dùl tiah sơm kòp is ală cau gơtìp kòp sốt xuất huyết. UɃÑZ càr Dăk Lăk jào Sở Y tế đơng lam mpồl lơh sơnơm tàm ală tiah lơh jăt broă sền gròi nền nòn broă lơh kloh niam tiah gơtờp kòp sốt xuất huyết, bơyai lơh ƀồm sơnơm 100% ală hìu gơwèt tàm tiah gơtìp kòp in.

Cau mblàng Ndong Brawl