Tàm bơta geh ngan do, Cơldŭ lơh broă Cíñ phủ neh ai lơh jat Jơnau yal sồ 394, sồr ală Ƀộ, ngàñ, ală tiah, ală mpồl lơh broă ală gah, jat tàm gơnoar broă, kơnòl broă mờ gơnap gơnoar geh jàu, sơlơ lòt sền, lam lơh jat ală kơnòl broă, broă lơh atbồ, gàr geh bơta sàng goh phan ngui sa jat di jơnau sồr tàm jơh tơngai lơh chờ nam 2023 dê.

Bal mờ ală tiah gùt lơgar dê, càr Ninh Bình là dùl tàm ală tiah geh mờr 100 dơ̆ lơh chờ dờng, dềt geh bơyai lơh tàm dơ̆ bồ nam pa. Tàm hơ̆, geh ală dơ̆ lơh chờ nam pa niam ngan, gơ hòi gơ jà khà năc lòt nhơl uă ngan, tus sền ù tiah niam bơnĕ. Ồng Phùng Văn Giang, Phó Kwang atbồ Ci kụk Gàr niam bơta sàng goh phan ngui sa càr Ninh Bình dê pà gĭt: tơngai lơh chờ nam 2023, Mpồl đơng lam Gàr niam bơta sàng goh phan ngui sa càr Ninh Bình dê neh geh broă rơndap lơh lòt sền, jat sền, atbồ phan bơna là phan ngui sa, gàr geh bơta sàng goh phan sa tàm jơh tơngai bơyai lơh dơ̆ lơh chờ.

Ồng Phùng Văn Giang, đơs: “Dơ̆ dùl là hòi jà uă ngan rlau jơh ală gah mờ gah mblàng yal jơnau nàng mblàng yal ală jơnau sồr bơh Dà lơgar dê bè gàr niam bơta sàng goh phan ngui sa tàm broă lơh gơlik mờ lơh sa kă bro. Mờ bơto pơlam làng bol sac rơwah ơn prăp lơh gơlik phan ngui sa dùl bă sàng goh; Tơrgùm tàm ală gah phan mờ tăc bro uă tàm kàl lơh chờ. Mờ bơh ngai 15/12/2022 tus 15/3/2023 den ală mpồl lơh broă ală tiah tàm gùt càr kung ai cau lòt lơh broă mblàng yal bè gàr niam bơta sàng goh phan ngui sa mờ lam ală mpồl lòt sền ală gah, gah lơh broă ờs mờng, lòt sền bè Gàr niam bơta sàng goh phan ngui sa nàng sền gŏ mờ di tŭ lơh glài ală broă lơh bè gàr niam sàng boh phan ngui sa”.

Dơ̆ lơh chờ Hìu Yàng Phờk Hương tàm xã Hương Sơn, kơnhoàl Mỹ Đức, ƀòn dờng Hà Nội là dơ̆ lơh chờ jŏ tơngai ngan rlau jơh, bơyai lơh tus 3 nhai. Ồng Nguyễn Bá Hiển, Kwang atbồ Mpồl Atbồ Tiah tềl lời wơl ù tiah niam bơnĕ Hương Sơn, pà gĭt: neh lơh mpồl lòt sền ală gah bè gàr niam sàng goh phan ngui sa mờ lơh glài tơn ală cau kơldang nùs lơh tìs mờ jơnau sồr. Ồng Nguyễn Bá Hiển, đơs: “Bol añ neh lơh Mpồl lòt sền ală tiah, tàm hơ̆ geh gah lơh sơnơm, atbồ drà kă bro mờ ală gah geh gơrềng mờ gơnoar atbồ ală tiah ƀòn lơgar dê nàng tơrgùm bơto pơlam mờ mblàng yal làng bol in, geh tŭ lơh glài tơn ală cau kơldang nùs lơh tìs, ờ lơh jat jơnau sồr bơh Mpồl bơyai lơh dơ̆ lơh chờ Hìu Yàng Phờk Hương dê tàm broă gàr niam bơta sàng goh phan ngui sa kung bè lĭp giă tăc phan loh làng tàm ală anih ràng tăc phan”.

Jat broă rơndap lơh tơngai lơh uă ngan”Sơlơ tơnguh tai broă lòt sền, jat sền mờ kơryan phan sa ờ gàr niam bơta sàng goh tàm tơngai bơyai lơh dơ̆ lơh chờ nam 2023”, Tổng kụk Atbồ drà kă bro sồr Kụk Atbồ drà kă bro ală càr, ƀòn dờng sơlơ tơnguh broă pơgồp bal mờ ală mpồl lơh broă geh gơnoar lòt sền, sền gròi sùm ală anih ơn prap phan, tiah tơrgùm phan bơna rềp tiah nhàr lơgar, ală anih tờm kă bro, siêu thị, drà tờm, anih ơn prap phan ơn mrềt, ală mpồl lơh broă blơi phan lơh sa kă bro phan ngui sa ơn mrềt bơh lơgar ndai dê,... Mơkung, sồr lơh glài kràñ gơwèt mờ phan ngui sa ờ loh tiah tờm lơh gơlik nàng kờñ kơryan broă kă bro phan sa ƀơ̆, phan sa ờ gàr niam bơta sàng goh.

Ồng Nguyễn Đức Lê, Phó Kwang atbồ Kụk Broă lơh, Tổng kụk Atbồ drà kă bro pà gĭt: “Bol añ tam gơl bơh broă Dà lơgar ai sră geh gonoar, dờp gơnoar lơh sa kă bro mpồl lơh sa kă bro in lơh broă tus Ală anih lơh broă dà lơgar dê sền gròi, jăt sền ală mpồl cau, cau lơh sa kă bro gam lơh jat broă lơh sa kă bro nàng gàr niam broă lơh sa kă bro lơh jăt di adat boh lam, nàng lơh mbè lơi ai ală mpồl lơh sa kă bro lơh gơlik phan, blơi phan bơh lơgar ndai, lơh sa kă bro ală phan ngui sa, mhar ai geh phan bơna bơh he dê drơng jơnau kờñ ai cau ngui sa in. Mơya, Ală anih lơh broă dà lơgar dê sền gròi, jăt sền ală mpồl cau, cau lơh sa kă bro gam lơh jat broă lơh sa kă bro nàng gàr niam broă lơh sa kă bro lơh jăt di adat boh lam tŭ mờ bol añ sền gĭt ală broă lơh halà ală phan ngui sa tìs den tŭ hơ̆ neh tăc bro tàm drà kă bro tàm khà uă ngan. Broă ai wơl kung bè broă lơh glài gơ tìp uă ngan kal ke. Mờ kwơ màng ngan rlau jơh là tŭ hơ̆, cau ngui sa tŭ neh ngui phan sa ƀơ̆, halà phan ngui sa ờ gàr geh bơta sàng goh den neh bơnah lơi gơrềng tus pràn kơl dang să jan, den tàng bol an gĭt wă geh bơta hơ̆ den tàng Tổng kụk Atbồ drà kă bro sùm ai broă tam dră mờ ală broă lơh tìs tàm broă gàr niam bơta sàng goh phan sa do geh lơh lài ngan...”

Mpồl đơng lam ală gah Dà lơgar dê bè gàr niam bơta sàng goh phan sa đơs loh: dơ̆ lơh chờ nam 2023 kwơ màng ngan tài bơh là tơngai bơtàu tơnguh wơl tơnơ̆ kòp. Den tàng, ală Ƀộ, ƀan, ngàñ, ală tiah, mpồl lơh broă geh gơnoar, Mpồl lòt sền ală gah pal pơgồp bal niam, lơh pràn broă kờp sền, lơh bal hiă sră nggal tàm broă lòt sền gah lơh broă ờs mờng gơwèt mờ phan ngui sa blơi bơh lơgar ndai. Jat hơ̆, pơn jat tai geh kơrnoat pal jat, broă lơh, gùng dà broă lơh ngan ngồn, nàng kờñ sơlơ tơnguh, pơn jờng ai ală phan bơna ngui sa gàr niam bơta sàng goh, phan sa hữu kơ mŭt tàm ală anih tăc bro phan. Pal sền gròi ngan là, phan sa pal geh bơto pơlam ngan ngồn, di pal bè atbồ gàr niam bơta sàng goh phan ngui sa kă bro tàm ală pang màng xã hội. Broă lơh lòt sền, sền gròi, yal tơngĭt, mblàng yal bè gàr niam bơta sàng goh phan ngui sa geh lơh pràn, sùm sùm, pơn jat sùm nàng tơnguh uă bơta gĭt wă lơh jat adat boh lam bơh cau lơh gơlik phan, lơh sa kă bro phan ngui sa, sền gàr cau ngui sa in lòt nhơl chờ hờp nam pa.