Lơh chờ Sầu riêng Dăk Lăk nam 2026 rơ̆p geh lơh bơh ngai 15/8 tus ngai 2/9, mờ pơgăp 1 rbô nă cau ala măt ală càr, ƀòn dờng, ală ƀộ, gah Dà lơgar mờ rlau 400 nă cau ala măt ală lơgar.

Nàng kờñ sền gàr niam sàng goh phan sa tàm dơ̆ lơh chờ, gah Lơh sơnơm Dăk Lăk neh geh broă rơndăp lơh, lam lơh tus ală ƀòn lơgar tiah geh lơh broă lơh do; mơkung sền swì jơh, kờp sền wơl ală anih ơm apah, hìu ñô sa dờng, hìu năc bè ală bơta lơh broă, rơcăng ồs sa mờ crùh ồs sa mờ niam sàng goh phan sa.

Gah Lơh sơnơm kung lơh pràn mblàng yal, sồr làng bol, cau tam sầu riêng mờ ală anih kă bro dồ anih, ntrờn làm bă tiah lơh jăt niam ală jơnau sồr pal jăt bè niam sàng goh phan sa lài, tàm mờ tơnơ̆ dơ̆ lơh chờ.

Ồng Trần Quang Hưng, Phó Lam bồ Cơldŭ Niam sàng goh phan sa, Sờh Lơh sơnơm càr Dăk Lăk, pà gĭt:

“Sờh Lơh sơnơm càr Dăk Lăk neh tơnggơs 2 mpồl lòt sền. Dùl mpồl lòt sền ală anih kă bro drơng broă sa priă ñô sa drơng năc lòt nhơl ngài tàm dơ̆ lơh chờ in; mpồl gam jăt sền ală anih hìu năc, hìu ñô sa, pơlam lơh jăt ală dơ̆ yờ sa bơh Anih duh broă Làng bol càr dê bơyai lơh, drơng cau ala măt in. Bơdìh hơ̆ tai, ală mpồl bơh Sờh Lơh sơnơm dê kung jăt sền ală Dơ̆ pơrlòng phan sa, ală cơldŭ phan ơn pơdơng phan bơna nàng kờñ sền gàr niam sàng goh phan sa”.